是咁的，照顧過我嘅護士死咗: 一百九十、聽護士姐姐話

我雖然好想問佢點解會得返一個人，但依啲已經算係私人野，見林林無繼續講落去，我亦無問。

得返一個人嘅理由，通常都唔係咩開心事。

根據合理嘅邏輯推斷，佢話「以為」我地一樣，即係我地唔同。

既然「得自己一個」係一樣，咁令我地有分別嘅就係另一句說話。

同鄰居玩得好埋，定唔怕寂寞呢？





唔通林林話佢同鄰居關係唔好？定係話佢好怕寂寞呢？

我同林林跟住人龍排隊，佢企我前面，拎咗銀包出嚟。

「唔該要一餅雞蛋仔。」林林開口。

「呃，咪住，我自己畀。」

林林雙眼瞇成一線咁睥住我：「你又買粥我食又送我返嚟，我請你食雞蛋仔都天公地道啫？」





「係啫⋯⋯」我仲未講完林林已經用三隻手指封住我個嘴。

「殊，你係病人，要聽護士姐姐話。」

「呃⋯⋯好啦。多謝哂。」

林林滿意咁微笑，畀錢。