是咁的，照顧過我嘅護士死咗: 一百八十二、本來
「持續背脊痛，係早期骨癌嘅症狀嚟。癌症只要愈早發現，醫得到嘅機會率就愈大。不過就係嗰半年喺大陸都檢查唔到咩事，先夾硬吽到癌細胞擴散變末期。」
所以阿叔會喊，除咗傷心之外亦有憤怒同唔忿氣。
對老婆確診絕症嘅傷心。
對中國醫療體系嘅憤怒。
同埋失去「本來」救得返嘅可能性嘅不忿。
「不過醫院已經準備遣返佢地返大陸。你可以話係佢地落嚟佔用香港資源嘅懲罰。不過佢依家至少知道太太有咩病。」
林林話私立醫院就咩人都接，所以有錢嘅大陸人落到嚟都會去私院。
公立醫院始終都係收香港人為主，會收佢太太係因為背部劇痛，點都係入咗香港醫院睇下咩事先。
不過驗完知係嚴重疾病，自然要送佢地返大陸自生自滅。
學我媽媽話齋，有咩事上嚟，永遠都係有窮人死先，香港同大陸都係一樣。