是咁的，照顧過我嘅護士死咗: 一百八十、大陸醫院
「咁你都知佢幾大情大性架啦，可能被我感動咗，就一野摟住我，係咁講多謝。」
阿叔喺香港無人無物，帶住老婆落嚟只係做一件事就係睇醫生。
事關佢老婆大半年前話背脊骨痛，痛咗好耐。而大陸嘅醫院，如果去過就知，傷風都會叫你照腦。
因為大陸好多醫院嘅收入係來自病人，運作方式就好似一盤生意，最大目標係要喺客人，亦即係病人手中榨取最多嘅錢。
點可以增加收入呢？就係做一大堆費用高昂但不必要嘅檢查。明明背脊痛又要驗腦又要照肺又做腸檢，但最重要最關事嘅檢查永遠唔做住。
如果反抗話唔做嗰啲檢查，咁真正關事嘅檢查就永遠唔會有得做。
問題係幾時先會檢查下背脊咩事呢？真係無人知。
睇下個醫生同間醫院有無良心，無的話就會無止境咁做無關嘅檢查，仲要同你講你好健康。
尤其係依啲睇唔到外在病徵嘅不適，就係醫生眼中最肥美嘅水魚，非常適合做一大堆似是而非但無實際用途嘅檢查。