是咁的，照顧過我嘅護士死咗: 一百七十二、李月澄！
「依位小姐⋯⋯」
林林忍唔住發作，但我伸手阻止咗佢，佢出聲十八子就仲激動。
「零食妹！零食妹！李月澄！」
十八子一路都唔靜落嚟，直到我叫佢全名為止。
每次叫佢全名，佢都會突然好驚咁，但絕對係令佢安靜嘅最佳方法。
「我同林林真係普通朋友嚟架。佢係照顧我嘅骨科護士，因為病咗，所以我今日送佢返屋企咋。」
林林點點頭：「無錯，你唔使咁大反應。」
「我⋯⋯我好大反應咩？薯片做咗咁多年人，連豬西、扒王之王同侏羅紀世界走出嚟嘅女都唔願同佢並排行，玩交友app唔用頭像先match到女仔，相睇公司都話unmatchable要close file嘅毒撚青頭大魔法師候補生⋯⋯今日同個靚女一齊行⋯⋯我都係擔心啫⋯⋯」
十八子愈講，我個身就好似被叮噹用縮小電筒照住咁愈縮愈細。