是咁的，照顧過我嘅護士死咗: 一百六十一、真正嘅分別

登記護士要讀兩年，而註冊讀五年，但出到嚟公立醫院做野，工作內容同辛苦程度完全一樣。

而真正嘅分別，在於職業前景同人工。

人工上，兩者起薪點差一皮。前景方面，登記轉註冊，一定要讀書無得就咁升職。

要成為阿爺或者sister的話，只有係註冊護士先有資格，靠年資、經驗同進修升上去。

「成日見到人講EN同RN，EN就係登記，另一個就係註冊。講到依度你應該知我同林林係咩啦？。」





有得升嘅德仔係註冊護士，無得升嘅林林只係登記護士。

「但佢一路都無進修，都係嗰句口頭禪啦，話咩與其哂時間讀書，不如返多幾更咁。」

睇嚟阿連所講嘅搏升同為錢嘅諗法，唔適用於林林身上。

「佢到底點解要去到咁盡？」

德仔拍拍我膊頭：「依樣要你自己問佢喇，係佢嘅私人事，我就唔講咁多喇。」





「咁⋯⋯你呢？點解你咁想升做阿爺？你自己都話想過走。」