是咁的，照顧過我嘅護士死咗: 一百五十四、多謝你碗粥

「但係⋯⋯」林林仍然猶豫不決。

「唔使但係喇。你身體無足夠休息，影響判斷，到時做錯野咪仲衰。你唔係唔知幾多同行都係太攰做錯野架啦。」

做醫生護士又忙又攰又唔可以錯，我覺得揸八個鐘頭車所花費嘅精神比就咁行八個鐘多，而喺醫院所花費嘅精神同專注力又係另一個次元嘅份量。

「你咁講都啱⋯⋯」

「你一路以嚟都唔放假，嗱我絕對支持你唔去玩，但拎嚟休息下，叉足電再返嚟，我就舉腳贊成嘅。」





德仔輕輕拍下我隻手：「你都幫手勸下林林啦。」

「呃⋯⋯其實係咩驅使你搏到咁盡咁返工？係愛丫？定係責任呀？」

唔好答我係窮呀DNGH⋯⋯

林林耷低頭。

「因為護士都只係份工嚟啫，有必要去到咁盡咩？」





聽到依句說話，林林好大反應咁擰個頭向我。

德仔無奈咁一掌拍落自己額頭度。

林林好安靜咁放低我碗粥。

「我飽喇。多謝你碗粥。」