是咁的，照顧過我嘅護士死咗: 一百四十、救人

「我最後遞完信，補返錢畀家計會，就辭咗職。」

「補錢走⋯⋯」

「因為嚟緊仲有個手術，但我真係頂唔順。」

本身我其實未食飽，但胃口就漸漸減少，直到消失。

一陣胸口好似被cat girl坐住嘅壓抑感令我心臟好似連跳動都覺得吃力。





鬱悶嘅位在於，我從來唔知十八見過依啲事。

佢自己一直一個人承受。

每次約我出嚟見面，喺我眼中嘅佢都係一如既往咁開朗活潑。

「之後我就一直走唔出嗰種自己做緊殺人犯嘅罪惡感。我知依啲都係自己強加畀自己嘅道德枷鎖，只要唔理佢就會好過啲，但我無辦法無視，亦好清楚自己個心一直都好唔舒服。」

為咗補償，十八子就入咗公立醫院做兒科護士。





「依家就算入手術室，都係幫手做搶救，當然有救到亦有救唔到嘅時候，至少我唔討厭分娩手術室。」

卒之由殺人，回歸到救人。

「我啲男朋友都未聽過，估唔到你係第一個。丫⋯⋯點解我會順勢就講咗出嚟架呢？」