是咁的，照顧過我嘅護士死咗: 九十、西女人
德仔話依啲怨氣同苦水都只能夠同我依啲局外人呻，唔係被sister聽到，又會被人召去照肺。
sister即係資深護士，男嘅就俗稱阿爺。
其實護士基本上都係處於同一陣線嘅群體嚟，大家都知醫院嘅問題出喺邊，但度度都會有鍾意報串又乞人憎嘅老屎忽。
德仔講緊嘅係骨科入面嘅資深護士，四十幾歲都無拍過拖嘅老處女羅婉儀，以壓榨其他護士為樂。
「佢唔係校長嚟咩？」
「同名同姓囉，總之都係西女人啦！」
「有無咁誇張呀？」
「依個又老又惡又嫁唔出嘅老女人心理唔平衡架，內分泌失調，荷爾蒙又分泌失敗。我唔知佢係一個月嚟三十日m定一出世就更年期定佢老豆每日都死一次啦，總之五分鐘唔鬧人就唔安樂架喇。大家都係女人我都唔幫佢呀。」
「你係男人嚟架德仔⋯⋯」