是咁的，照顧過我嘅護士死咗: 七十七、中大畢業日
直覺話我知，佢係講緊自己屋企。
其實識十八子咁耐，都無聽佢講起過屋企人嘅事。
講緊係識咗超過十年嘅朋友，但我都對佢屋企嘅情況都係零認識，除咗有心隱瞞之外我諗唔到第二個理由。
佢唔講，我亦無問。
就算到咗中大畢業日，咁重要嘅日子，我都無見過十八子嘅爸爸媽媽。
全日就只有佢當時嘅男朋友幫佢捧花、公仔同汽球。
「喂！又話我大學畢業有花嘅？」
「你男朋友實送比你架啦，邊拎到咁多喎，所以咪唔送囉。」
因為依件事，十八子真係嬲咗我。
「無口齒！我等咗你五年，你話過我畢業嗰日會送花比人架！討厭鬼！」