是咁的，照顧過我嘅護士死咗: 六十五、從來無惡意
我好少見十八子咁認真，所以都靜靜咁聽佢講。
「當我知道有人原來咁容易骨折，初頭係好驚，點解咁痛你都可以忍受得到，係咪怪物嚟架？直到你成日借啲文具我用，我就發覺，咦，唔係喎，你都係人嚟啫。」
講緊小學嗰陣，十八子成日用啲舊文具，鉛筆又短，擦膠又細粒，至於我媽媽就一定要比最好嘅我，所以我就成日將啲新文具借畀佢。
「之後就開始覺得你好西利，成日骨折入醫院都仲生存到。明明就好痛好痛，但你從來唔流眼淚，慢慢就覺得你好勁喇。咁身邊有個勁人，就梗係想痴埋去架啦。」
十八子拎出佢口內嘅雪條棍：「痴下痴下，咪痴到依家咯。都痴咗咁耐啦，點會想見你唔開心喎。」
佢將碌棍放喺我手，奸笑：「幫我掉啦，薯片。」
點解我一直都唔討厭十八子叫我做薯片，大概係因為，依個花名入面，從來無惡意。