是咁的，照顧過我嘅護士死咗: 六十一、反擊

嗰日班主任堂，黃sir好嬲，話咁樣係破壞公物，叫人自首。咁當然無人認啦，結果係連坐法，話要罰哂全班。

最後班長終於睇唔過眼，篤咗班入面平時成日笑我嘅肥仔技安出嚟。

十八子喺座位企起身，張凳重重咁撞上後座張枱。

「李同學，你做咩呀？返埋位。」

十八子靜靜咁行過去肥仔技安面前，微微一笑。





碰！

佢兜搥將對方打咗落地，仲發揮哂百分百嘅不良少女本性，掃哂技安啲書落地，拎起張凳舉手就揮落去。

黃sir見勢色唔對即刻復上前阻止，班長佢地都一齊幫手㩒住十八子。

「李同學！停手呀！」

好彩張凳揈咗去另一邊，無直擊技安，唔係實會搞到好大件事。





之後喺留堂、值日同打理小花園個日程表上，十八子個名霸佔哂啲格仔，直到嗰一年最後一個上課日。