是咁的，照顧過我嘅護士死咗: 五十、情書表白
當年好蠢咁寫情書表白。
我翻睇過好多次，見有錯字就重寫，見啲字唔靚又重寫。
結果成個星期都用哂啲時間寫情書，嗰個禮拜嘅小測全部都係試卷交上台，零蛋掉下來。
我想自己人生第一封情書係完美嘅，無瑕疵嘅，以為只要封情書整得靚仔啲，就可以增加對方答應我心意嘅成功率。
每個人細個都有啲不切實際嘅幻想，直到現實兜頭揭你一巴掌。
確定自己有封完美嘅情書之後，我突登六點鐘起身返學，偷偷地去我女神班房。
由於太早所以無人，我就急急腳將封信放喺女神櫃筒。
嗰日全日個心都係囉囉攣，一方面期望成功，一方面又驚失敗。
上堂我完全專心唔到，科學黃sir問我地球公轉一日要幾耐我都答唔出，又送多個笑話比全班，日後多一款花式笑我。