是咁的，照顧過我嘅護士死咗: 四十九、表白

雖然我睇書話只要滿足到女人嘅感性條件，對方就會唔理性咁同你一齊。

但所有可以吸引女人嘅特質我都無。

脆骨症唔講啦，又矮，又無野叻，又無錢，又唔靚仔，又唔識口甜舌滑，又唔浪漫，又悶，又毒，又無情趣，又無自信⋯⋯下刪一萬字。

「喂？唔使頭耷耷下話？無啦啦成個人頹哂咁嘅？」

同埋我中學都試過膽粗粗表白。





結果係點唔講都知，雖然比人當怪物咁看待同嫌棄令我唔開心咗幾個月，但亦令我更加清楚自己嘅角色定位。

即使有阿nick，又有五體不滿足依啲例子，但無奈我唔係佢地。

而當日嘅衝擊亦令我更加收藏自己嘅想法。

鍾意人都唔可以表明，如果越界，就連朋友都無得做。

好記得嗰幾個月，係十八子陪住我過。





又或者話夾硬拉我陪佢過。