是咁的，照顧過我嘅護士死咗: 四十三、兜唔到

「金仔，無野丫嘛？」阿連走嚟問我。

我望向林林。

「啊，檢查咗喇，佢無事。」

阿連嘅視線喺我同林林之間游移，我向阿連微微一笑。

「啊⋯⋯呃⋯⋯唔，唔該。」





林林有禮貌咁點點頭：「唔使客氣。」之後擰返過嚟對住我，已經額頭鑿住個「西」字。

「金仔，我喺樓下等你呀下。你同阿嫂慢慢。」

我即刻睥到阿連入𨋢。

林林叉住腰，向我歪歪頭：「咩阿嫂呀？」

「佢話asso之嘛。」





「無啦啦阿咩蘇。」

「叫我慢慢讀asso⋯⋯算啦，我兜唔到⋯⋯」

「你知唔知你啱啱咁好危險架？」佢直接無視咗阿嫂依單野，明顯完全無放喺心上。

「知道。但你啱啱有危險丫嘛。」

「我唔緊要架，依啲情況見慣見熟架喇。我唔可以令個病人為咗我受傷架，你平日已經請咁多野我食，嗰啲都未還架我。」





其實無諗過要你還，因為心底要求回報的話已經唔係無條件嘅付出。

但我都係乖乖聽佢講。