凶港: （1）

沙沙。。。。 轟隆。。。。 「起身啦！」阿媽如常大大聲咁叫醒我。 「得啦，瞓多陣都唔得...」我一臉倦容，好燥咁回應，然後落床。

我叫阿駿，係個平凡既中五生. 平時鐘意打機，成績？唔上唔落啦。 [7點半啦!要出門啦!] 阿媽喊。 [得啦!]我唔耐煩。繫上鞋帶。

讀書係好辛苦，仲要咁早起身，但係為咗前途，讀大學搵好工，我又無辦法唔讀。諗到呢度，無奈既我嘆左口氣，拎起把遮出門。

今日嘅雨好大，路上嘅人都全身濕晒，狼狽不堪。而我亦唔例外。

唔知係咪我錯覺，今日條街咁少人既? [八號颱風咩。。]我冷笑。



幾經辛苦，到左學校，如常，校工姨姨喺大門口度鐵閘度同我地班學生哥打招呼，我點一點頭，拖住濕晒嘅身入學校，心諗：「唉，真係黑，成身濕晒！」 個天真係好黑，彷彿置身地獄咁，我出世以嚟都未見過咁惡劣... 「喂，阿駿!」一把甜美嘅聲喺我背後傳黎，我轉身一睇，原來係我女神BB，「乜咁濕嘅你？」，我當堂尷尬到想搵個窿捐入去，但係點都要型埋佢嘅 「無呀，我把遮係我戰友，我唔想整濕佢姐...」我扮瀟灑咁抹走肩上既雨水。 「哈哈，你真係好傻呀!」佢望住扮瀟灑既我，忍俊不禁。 「嘻嘻...」我尷尬咁摸咗一下個頭

我博到女神BB笑呀，正！

我當堂放鬆晒，即刻精神無比，同女神BB有講有笑咁番班房。

一如既往，班入面永遠好靜，個個都唔講野，其實咁都幾可悲，個個讀書讀到傻咗呀？連水都唔吹下。

班房持續沉默，好似我係個隱形人咁，唔存在係呢個班。 「成班道友咁！你地做乜呀，中邪呀？」我個心入面永遠係咁諗，但永遠唔敢講... ------------- 鐘聲響起，小息。



我出到走廊，睇下風景。

雨一直咁落，完全無停落黎嘅跡象。 「喂，死仔！」 有人大大力拍我，原來係我地班嘅班長兼風紀阿鋒

阿鋒係我好朋友，佢同我由細識到大，其他同學初初識我地仲以為我地係搞基，因為我地實在太friend。 「屌，乜料呀你？」我繼續望住風景。 「你睇下你，扮晒野咁，係咪又想扮型溝女呀？」佢係度諷刺我。

女神BB咁啱上完bio經過，於是我就扮頹廢咁望風景。

當然，女神BB又笑我，我暗爽。 「好威啦依家？落去當值啦男神。」阿鋒拍我肩膀，半講笑咁話。