陸一發與三六狗: 第二章 越光飛車

「隧道嘅左邊係通往過去，右邊就係穿越未來。」響時空隧道入面，三六狗唔止識得講嘢，仲好似人咁用雙腳行路，真心講3個字：嚇鬼死！

我同三六狗直行走過嗰段白光道路之後，穿過一道門，回頭只見門上寫住2015年12月25號。跟住我見到隧道分成左右，左邊係藍色，右邊係紅色，兩邊都係無盡頭；而門前就停咗一部黃色跑車，三六狗話呢部叫越光飛車，就係靠佢帶我哋穿越時空。我同佢講，咁不如返去3年半之前仲未同女友分手嗰陣，睇下可唔可以再挽救段感情。三六狗睥咗我一眼，就同我講：「你衰花心，再返去就算畀你忍住一時，最尾咪又係衰一鑊。而且你要記住，唔理係返到過去定係去到未來，都千祈咪亂做任何嘢諗住改變，否則就會時空大亂，好鬼大鑊！」聽完呢番語帶諷刺又有阻嚇性嘅話，我把心一橫同佢講：「咁就去20年後，我想睇下未來嘅自己會有個點樣嘅家庭。」

我哋坐上越光飛車，發現架車好鬼先進，擋風玻璃竟然彈出今日嘅日期，之後三六狗伸手將個年份改為2035年12月25號，跟住再響上面用觸控式鍵盤，輸入陸一發屋企。當架車一起動，紅光馬上一閃，掁眼到咩都睇唔到，只係大約十幾分鐘，三六狗就話到咗。我哋落車之後，打開上面寫住2035年12月25號嘅門。

門一打開，即刻傳出好香嘅雞湯味，而我哋眼前嘅門牌寫住12樓A室。最搞笑嘅係，我身邊嘅三六狗竟然變咗一隻英國短毛貓，點知當我開聲問佢發生咩事嗰陣，令到我差啲大叫起嚟，原來我聽到自己把聲，竟然係一把師奶聲，再向下一望，即刻驚問：「嘩！搞咩我變咗女人？」

三六狗細細聲笑住解釋：「咁我哋返到過去定係去到未來，都可能會撞見識我哋嘅人，甚至係我哋本人，所以響第二個時空，就會用另一個身份出現。」我聽完就心諗，咁都唔使變成女人啩，忍唔住怪責三六狗兩句。