陸一發與三六狗: 第一章 時空隧道

「發仔，今日校園欺凌篇報導寫得唔錯！」聽完老總嘅稱讚，我辛苦咗成日去周圍刮料，都總算值得。

唔記得自我介紹，我叫陸一發，33歲，老竇媽子想我一朝發達，但我就一世發夢，發咩夢？咪係記者夢囉，話晒係「無冕之王」嘛。呢家響《三六九日報》做咗7年港聞記者，最近終於升咗做高級記者。老竇一早過咗身，我呢家同阿媽仲有兩個妹住響東涌一個私人屋苑，3年幾前因為自己鍾意個女同事，被女友撞見，搞到分手收場，之後悶悶地就買咗隻柴犬返嚟陪下自己，仲幫佢起咗個名叫「三六狗」。

講開三六狗，我起初以為自己係同佢有緣，後尾先知道其實係佢揀咗我做佢主人。記得嗰日係2015年12月23號，當時狗舖有3隻柴犬，但只有佢隔住玻璃睥住我，又不斷擺動右前手，好似叫我行埋啲咁，而其他兩隻柴犬根本睬都冇睬我。帶三六狗返屋企嗰陣，佢仲好似已經知道我住邊間房咁，直接走咗入去，之後響我衣櫃前面打轉，又不停用鼻響度聞，聞住一輪就坐咗響前面。最後一人一狗一個瞓響床，一個瞓響地板上，平靜過咗一晚。

到咗第二朝，我打開衣櫃，三六狗突然係咁又吠又跳，之後佢仲想跳上去，我嗱嗱聲用隻左腳擋住佢，拎咗衫褲同襪就即刻閂埋櫃門，換完衫就出門口返工。當晚返到屋企已經差唔多12點，我發現三六狗又攤響個衣櫃前面，一見到我就好似招手叫我埋去咁，不過已經攰到爆嘅我無理到佢，沖完涼吹埋個頭就跳上張床諗住瞓覺。響我半夜瞓緊嗰陣，突然聽到開門聲，睜開眼就見到一道白色強光由衣櫃發出，即刻坐起身一望，竟然見到三六狗已經將上半身捐咗入櫃。我嗱嗱臨落床想捉住佢，點知一望之後當堂呆咗，原來個櫃裏面竟然有一條隧道。

「阿發，不如我帶你行下條時空隧道，你想返去過去，定係想到未來？」聽到把聲嚇鬼死我，同我講嘢嘅，竟然係三六狗，我仲以為自己發緊夢。佢之後用牙咬住我右邊褲腳，扯我行埋去衣櫃，而衣櫃裏面一件衣服都唔見，只得一條發光隧道。出於好奇，我就探身入去想睇下咩嚟，點知三六狗竟然從後猛撞我一下，我失平衡之下就仆咗入去，三六狗亦都跟住跳埋入嚟。