恐怖蔓延令你一讀一驚心《攝魂偽術家》18+ 墮落始源: 第92章 - 亡命邊緣

在大利島碼頭，局勢仍然處於僵持狀態。
「丁佑男你係咪痴撚咗線？我叫你隊你條女呀！」喉嚨被人從後鎖扣，程淑雯勉強說話時面露詫異神情，但態度仍然是一貫傲慢。
「全部同我企度咪亂郁，依家死八婆條命嚮我度！」丁佑男說，同時以程淑雯身體作為擋箭牌面向一眾興展堂槍手。「PAULINE妳唔好當我係白痴仔，話妳知上次唐生死前原本打算打電話俾我！點知我接過電話後發現對方冇聲出，但竟然俾我聽到有一男一女嚮度商量，打算要落手斬佢條屍。原本我都只係懷疑，但係妳勢估唔到尋日我入元朗幫妳執手尾時，俾我搵到隻USB，裡面有條片，居然係妳同條神棍一齊商量點殺唐生同併吞興展！狄比講得冇錯，妳果然係隻魔鬼！」
「丁佑男你到底想點？」程淑雯說。
「一個換三個！叫妳班馬先放咗狄比，然後等青頭同條差佬一齊送佢搭快艇走！」
「佑男我知你係扮野，我地一齊走！你唔好DUM低我！」狄比強忍著腹部痛楚，一臉淚水地說。
「妳咪懶醒！我同PAULINE已經上過床！計落佢欠我條數仲要慢慢以肉償還，妳走咗之後我就上床砌佢！」
「哈哈哈哈！估唔到丁佑男你死到臨頭仲扮有型！你個好兄弟RICKY係二五仔，佢同條差佬夾埋，你放走佢地你死梗。」程淑雯說，面上展露出一副猙獰的樣子。
「佑男，依筆賬係我欠你嘅！你如果肯自首的話我同何SIR都會為你向法官求情。」招卓行向丁佑男喊話。
「青頭，如果你仲當我係兄弟的話，就同我送走狄比。我自小無父無母，如果唔係唐生肯收養我的話，睇怕我已經餓死咗，食得依行飯，我就預咗要還！」丁佑男說。




「我唔走！要走我地一齊走！」狄比一臉喪哭爆喊般狂叫。
「立即放條女走！」程淑雯向手下命令。話畢，一眾手下即時釋放了狄比。
「RICKY，趁機會我地即刻帶證人離開！」何定邦向招卓行說。
「佑男你自己小心！」招卓行向丁佑男說完最後一句，便和何定邦一起帶走狄比，往快艇方向走去。

當眾人目擊三人登上快艇後，程淑雯向包圍著自己及丁佑男的其中一人使了個眼神，然後那人一步一步移近丁佑男。
「咪過來，你條神棍同我企嚮度！再行近我隊冧佢！」丁佑男向步近的人說。
「放 . 開 . 佢！」那人說話語氣強而有力，同時以詭異眼神望向丁佑男，丁佑男彷彿像著魔一般雙眼回望對方，奇怪的是丁此刻緊扣著程淑雯的手竟無緣無故徐徐放開，如同被別人控制著一樣。
「丁佑男你今晚一定會好感激我，因為我幫你一次過解決所有背叛你的人，等你下半世唔駛坐監，你就送隻腳俾我當做回禮啦，哈哈！」程淑雯說話時面露奸笑，同時轉身一手捉住丁持刀的手，另一隻手則緊握丁的衣領，令整個形勢即時逆轉起來。「知唔知點解我咁順攤放佢地走？」





那邊廂，快艇剛開動不久，招卓行馬上聽到引擎傳來不尋常聲響。「有古怪！」
「聲音係炸彈！你兩個快跳水！」何定邦向招卓行說，並且以手把二人推下海中。
轟！伴隨著一下激烈的爆炸聲，快艇在海中瞬間解體。