恐怖蔓延令你一讀一驚心《攝魂偽術家》18+ 墮落始源: 第76章 - 上釣的大魚

告別沈碧君後，何定邦一人來到坪洲獨自磯釣作樂。由於午後陽光猛烈，何戴上漁夫帽和墨鏡，身穿白色休閒服，在乘船抵達坪洲後，經過大利橋前往大利島，在一個面向大利島碼頭的合適岩礁位置坐下來。開始釣魚後大約過了一個小時，一艘快艇從遠處駛來，接近並停泊在大利島碼頭旁，快艇中只得一人，那人步上碼頭，向著何定邦身處的岩礁位置前進，繼而於何身旁坐下，然後釣起魚來。
「何SIR，釣到魚嗎？」招卓行說。
「今日運氣好，俾我釣到鱸魚。」何定邦說。
「睇唔出何SIR原來係釣魚高手，犀利。」
「釣魚要講耐性，你要明白魚的心理，先可以引佢上釣。」
「講到上釣，何SIR你真係要小心身邊的人，興展堂個邊放咗條針嚮警署，關武雄的死都係同佢有關，但我查極都查唔出依條友係邊個，同埋唐龍點解會知道關武雄出賣佢。」
「你千祈唔好用EMAIL同我聯絡，以免曝露你身份，我估我個警署電郵同私人電郵都同時被人監控。」何定邦說話同時，他手中的魚竿又有一條魚上釣。「話時話，依家邊個坐上雙花紅棍個位置？」
「雙花紅棍依家係丁佑男。自從關武雄死後，佢個妹即時失勢，唐龍仲逼佢嘔返晒關武雄吞咗落肚的錢出來。唐龍最近仲搞埋離婚，之後立即同另外一條女結婚。」
「佢同邊個註冊結婚？」
「程淑雯，嚮唐龍個骨場做媽媽生，條女最近好得佢歡心。」




「知唔知程淑雯嚮堂口有冇影響力？」
「佢同丁佑男幾熟，生意上又幫得唐龍手，睇怕連關武雄的黑材料都可能係由佢交俾丁佑男。」
「幫我監視程淑雯同丁佑男，我地目標係要抽出唐龍的所有犯罪證據。」
「明白。」
「RICKY你自己都要小心，特別係要防範丁佑男。」

兩日後，招卓行在興展堂的馬欖內跟一名女子談話。
「RICKY，你知唔知最近佑男搞邊科？佢經常出入都黐住PAULINE，人地依家係龍哥老婆，佢到底知唔知自己咩身份？」說話的人是丁佑男的女友，名叫狄比。
「佑男家陣係雙花紅棍，而新任阿嫂又識得幫手打理業務，佢兩個同時一齊忙做野都係應該，話晒唐生咁大盤生意交晒俾佢地。」
「佑男邊識做生意？我見佢終日神不守舍，成個人十足撞邪咁，行出行入跟住PAULINE做保鑣，佢最近全身都係PAULINE個陣香水味，身上仲有被女人指甲刮傷的地方添。」




「唔通妳呷醋？」
「如果係以前，我根本就唔駛驚，因為PAULINE係我姊妹，但最近PAULINE佢成個人變晒，出入完全唔認得人，講野時語氣似殺人咁款好兇狠，唔知點解每次我同佢有眼神接觸時我都好驚，總覺得佢會害我，而且.........」
「而且乜野？」
「最近成日有個師傅跟住佢，話幫佢睇風水檔煞，但個師傅對眼好邪，好似鬼咁。」
「佑男個邊有我睇住，妳幫我留意住佢地。」
「唔該你RICKY哥，我地一於互相幫忙。」