恐怖蔓延令你一讀一驚心《攝魂偽術家》18+ 墮落始源: 第72章 - 人肉刺身

離開警署後，關武雄到銀行欲提取鉅款。
「對唔住關生，你個戶口的資產被凍結，暫時未能提款或轉賬。」
「豈有此理，班差佬今次來真的！」關武雄於話畢後向銀行職員豎起中指，然後致電給親妹：「阿妹，阿哥今次要著草！妳可否借住五球俾我應急呀！」
「喂！.......好衰架你，俾返條底褲人！」電話內的女子向身旁的人喊話。
「屌拿聲，妳隔離係邊個呀？」關武雄在電話旁爆粗。
「係你保鑣堅仔，你千祈咪同龍哥講呀！」女子說。
「今次我地水浸眼眉，妳仲嚮度瘟仔！」
「我邊有咁多現金放嚮身！俾我一個星期時間多點，我估龍哥仲未知你食夾棍，總之你自己要小心，睇下邊條友係二五仔！」

 一個星期後，唐龍在日本料理餐廳嵐山設下飯局，宴請關武雄，商量洗黑錢的戶口遭到凍結的問題。唐龍一口氣包下餐廳晚上全場，飯局設在嵐山的地牢貴賓房，關武雄與保鑣堅仔應邀赴約。




宴會中，唐龍與丁佑男與及十多名保鑣現身，唐龍坐在主席位置獨自在喝清酒。一眾人等了良久，關武雄率先問道：「龍哥，叫齊咁多手足來今晚到底食乜野？」
「未咁快食得住，今次我地興展堂俾班差佬起尾注，所有賬戶一下子被凍結，你估我地堂口入面係咪有二五仔？」唐龍反問。
「我唔知係邊條契弟做，如果知，我實第一個幫龍哥隊冧佢！」關武雄回答。

此時待應為所有人送來各式刺身，唐龍才吃了一口，便吐了出來，同時說到：「我地入面有二五仔，搞到我食乜都冇離滋味！」
就在此時，丁佑男在飯局中致電招卓行說：「喂青頭，快點趕來元朗廢車場，我地今晚要做野！」
「做乜野？」招卓行在電話內問。
「過來你就知，要快！」丁佑男說完後隨即收線，並向唐龍打了個眼色。
「個二五仔已經俾我搵到，主菜就要上檯，家陣全部人跟我一齊入元朗！」唐龍說。