《天堂之上 - Upon The Heaven》: 第七集: 工作
晚飯之後，阿澄回到自己房間，開始做功課，因為今天是國王的生日，所以全城放假一天，明天阿澄便要上學，但她今天只顧遊玩，功課的事似乎被拋諸腦後，因此今晚阿澄將會非常忙碌。澄媽坐在客廳，看著電視上的節目，似乎很歡樂。而阿偉走到莊園，臥在長椅上，看著天上一閃一閃的星空，腦海裡好似想著某些事情，於是他閉上眼睛感受一下此刻的寧靜。這時，天冰回到家中，脫下上班的裝束，坐到澄媽身旁。
「點呀，今日係咪好辛苦呀？我幫你按摩啦。」澄媽溫柔的說。
「係呀，今日國王生日，所以要多啲人手巡邏呀，真係行到我腰痠背痛呀。」天冰埋怨著。
澄媽走到沙發後面，替天冰按摩肩膀，技術雖然不太熟練，但姿勢也「呃得下人」。
「係喎，阿偉去咗邊度呀？」天冰問。
「佢話想自己一個靜下，之後去咗莊園度休息。」澄媽說道。「係喎，阿偉成日都心事重重，好似好唔開心咁喎，你使唔使去同佢傾下計？」
「佢應該係離開咗家鄉，嚟到呢度有啲唔慣啫，俾啲時間佢，遲啲佢就諗通架喇，我哋俾佢一個人抖下啦。」天冰說。
「希望係咁啦，」澄媽說道。「嚟啦，老公，我煲咗湯，你飲啲啦，有益呀。」
「我真係好幸福，有個咁好嘅老婆！」天冰笑著說。
「飲湯啦，傻豬！」澄媽害羞的說。
澄媽和天冰坐在沙發上看著電視，電視上播映著綜藝節目，參加者的臉上都掛著笑容，非常歡樂。此時，阿偉走到了客廳，看看澄媽和天冰的背影，再看看電視上的節目，心情似乎放鬆了少許。
「你哋真係恩愛喇！」阿偉對天冰和澄媽說。
「阿偉，有咩要幫忙呀？係咪出面凍呀，咁入返嚟啦……」澄媽說。
「哦，唔係，我冇嘢呀，唔使擔心。我返房先喇，你哋都早啲抖喇。」阿偉漫不經心的說。
阿偉向澄媽笑了笑，之後便走上樓梯，回到了澄媽幫自己準備的客房，躺到床上，閉上眼睛，但似乎睡不著。阿偉便起來坐到窗前，望著眼前的風景發呆。看著看著，阿偉便倚在窗邊睡著了。今晚，夜裡的月光照在窗台邊，阿偉的影子模糊地顯現在地下的瓷磚上，微微的、冷冷的晚風吹撥著阿偉的髮端，樹林中雙雙對對的夜鶯一起一落的鳴叫，令這個孤單的影子，更顯寂寥，凄冷，就這樣阿偉渡過了他在晴空之城的第一個夜晚。
慢慢地，阿偉睜開眼睛，原來已經到了另一天的早晨，阿偉揉揉眼睛，伸伸懶腰，看著窗外橙紅色的晨曦，似乎陽光的溫暖令阿偉的睡意漸漸消散。遠方連綿的山巒，在晨光照耀下，形成長長的影子，彷彿掩蓋了在它們護蔭下茂密的樹林，林中的植物都不時晃動，想必是各種動物都已經起來活動了，聽著晨鳥高吭的叫聲，令人充滿活力。阿偉收拾好房間，走到樓下，看看其他人起床沒有。
「早晨呀，天冰哥，乜你都咁早起咗身喇。」阿偉說。
「係呀，我要準備返工嘛。係喎，你今日同我一齊出去，我同你搵阿斯，睇下佢嗰度有啲咩嘢工作啱你做，你快啲洗個面，食埋早餐跟我出去啦。」天冰對阿偉說。
「阿斯？係邊個嚟架？」阿偉疑惑地問。
「佢係我哋晴空之城嘅工程師，國王有咩問題都會搵佢架，好幫得手架。」天冰回答。
「OK，咁我去個洗手間先。」阿偉急步行到洗手間。
「快啲手呀，唔好搞到我遲到呀，阿斯最憎人地唔守時架。」天冰叫著。
「我知道喇！」阿偉咬著牙刷說。
阿偉快速地執執自己的儀容，便跟著天冰出去。因時間太趕急，來不及讓阿偉吃早餐，他便拿著麪包，一邊走一邊咬，連水都顧不上喝。很快，便到了天冰上班的地方，是一座很華麗的城堡，城牆上都充滿非常有特色的圖案，似乎是技巧高超的工匠，用心地一筆一筆的雕上去，圖案中的都是一些不知名的符號，還有些怪怪的物體，不知道是神仙還是妖怪，好像是某種傳說和神話中的人物。阿偉並沒有太過在意，只是輕輕將目光帶過，把它們映入眼簾。天冰帶阿偉來到了城牆上，獨自向著那道守衛森嚴的門走去。
「阿偉，你係度等等，我入去同佢哋講幾句先。」天冰吩咐著阿偉。
「咁我係度等你啦。」阿偉說。
阿偉走到城牆邊，倚在欄杆上，看著遠處的溪流，此時的太陽已經越過了山頂，陽光折射到緩緩的溪流上，閃閃生輝，天空上薄薄的霧被陽光照射後慢慢消散，一羣雀鳥在阿偉頭上飛過，阿偉用力吸了一口空氣，彷彿感到了一絲的甘甜。數分鐘後，天冰和一位穿著工作服的人來到了阿偉面前。
「呢位一定係阿斯喇，你好，我係陳迪偉。」阿偉伸出了右手。
「我係恭晴斯，我負責晴空之城嘅所有大小工程，你有咩要幫忙都可以搵我。」阿斯與阿偉握握手。
「工…工程師？」阿偉好像一頭霧水似的。
「有咩問題？呢張係我卡片。」阿斯將卡片塞到阿偉手中。
「哦！呢個恭晴斯，你媽媽真係識改名喇……」阿偉笑了笑。
天冰和阿斯都沉默了一會，目無表情，不知道給甚麼反應。
「呀…今日天氣幾好喎……」阿偉尷尬的說。
「入嚟我辦公室先講。」阿斯扭頭便走。
「你做咩成日亂講嘢啫！」天冰問。
「對唔住呀，我諗住大家氣氛咁緊張…」阿偉尷尬的說。
阿偉和天冰就跟著阿斯，沿著樓梯走到了四樓，到了阿斯的辦公室。
「原來已經咁晏架喇，阿偉，你同阿斯慢慢傾，我要做嘢喇，有咩事自己搞掂，拜拜。」天冰趕急地又再落了樓梯。
「唔係呀嘛，天冰哥……喂……」阿偉叫著。
但天冰卻連頭也不回，一口氣地走出了門口，剩下阿偉跟阿斯兩人。
「咁我哋入去先傾啦。」阿斯推開門。
阿偉跟著阿斯進了去，只見房間中有著一大片落地玻璃窗，窗外景色十分熟悉，正正是阿偉剛才在城牆上所看到的風景，是那座高山，還有那條小溪。房間的牆上掛著許多水墨畫，雖只得黑白兩種顏色，不過細細品味一下，也能感受到當中的韻味。房間兩邊還有書架，上面只放著少許書本，大部分的卻是雕像和擺設。阿斯請阿偉坐下，談了一下阿偉的情形。
「阿偉，天冰同我講咗你嘅情況架喇，我哋亦都覺得你無惡意嘅，所以你可以放心係度住，仲有呀，咁唔知你想做邊方面嘅工作呢，我哋有好多方面都等緊人手。」阿斯問。
「我想問呢，點樣先可以離開呢度架，你知我係香港嚟架啦，我想快啲返去。」阿偉問。
「嗱，老實講，我見你個樣幾誠實，又無惡意，而天冰又保證你唔係其他國家嘅間諜，我哋先至會破例俾你留係呢度。如果你要走，咁即係唔尊重我哋國家…第一，我唔知香港喺邊度；第二，要離開亦都唔係咁容易。我要講嘅就係咁多，你要知嘅亦都係咁多。咁我再問你，想做邊一類嘅工作呢？」阿斯語重深長的說。
「咁…我之前係太空人嚟嘅，關於機械或者科學嘅工作我都可以幫到手…」阿偉說。
「咁呀……」阿斯看了看他的手冊。「咁啦，我哋電動車部門宜家做緊研究，呢個係我哋嘅新科技，你可以去呢個部門幫幫手，你點睇？」
「咁…有冇啲關於飛機呀，或者飛船之類嘅工作呀…」阿偉吞吞吐吐的回答。
「嗰邊暫時冇需要額外人手喎，可能遲啲睇下點。係呢，你做咩咁想做呢方面呀，你唔鍾意電動車咩？」阿斯問。
「冇呀，我隨口問下啫…咁好啦，我諗電動車嘅研究，我都幫到手嘅。」阿偉說著，伴隨著一絲失落。
「咁好啦，我同嗰邊嘅同事講，睇下幾時可以正式開始工作啦，我會叫天冰通知你架喇，你放心。」阿斯邊講邊在冊子上填下資料。
「多謝你呀，阿斯。」阿偉客氣的說。
辦完正事後，阿偉離開了阿斯的辦公室，慢慢地走下樓梯，離開了這一座城堡，向著天冰的家回去。
「嚟咗呢度，又唔知幾時先可以走…唉，點算好呢？」阿偉心中想著這個問題，而這個問題一直伴隨著他，回到家門口。