《印度 · 尋油 · 台灣妹》: 《十四》

Priscilla 啱啱同我講，原來佢同 Priscilla 今晚就會番台灣，我唔算太驚訝，因為一早預咗有咁嘅一日，只係嚟得比預期早，知道咗，我盡量掩飾，但 Priscilla 仍然感覺到我有啲唔開心，所以全程對住我微笑，我見佢咁努力，都唔想佢擔心， 扮無嘢，繼續食。 


離開酒店，等車期間，我好自然咁拖住 Priscilla，佢望一望我，笑一笑，無反抗，直至番到 THE OBEROI GURGAON 酒店，送到佢番房，我仍然唔捨得放手，約好一點樓下餐廳再見，我就一個人行咗落去大水池邊坐，吹吹風，心情好矛盾，出嚟旅行，原本應該開開心心，依家攪到發展出異地戀，我同自己講，醒吓啦，文西，邊有可能㗎！坐咗一陣，我就帶住疲倦嘅身軀番房。 


花仔一見到我，咩都唔問，淨係問我尋晚有無食到台灣菜，我話無，佢好莫名其妙咁講咗句 


「你就好彩喇！」 






？？？？？ 


之後，大家講番尋晚點樣响後巷點走甩，我就問佢同 Heidi 番到酒店有無發生啲咩事，佢竟然一反常態，唔講嘢，逃避我嘅提問，仲話今日淨係想响房休息，邊度都唔去，見佢咁奇怪，都無即時追問。 


花仔好似隻死狗咁，無神無氣，都唔知攪乜，對住佢不如早啲落去等 Priscilla 好過，我比預定時間早咗十五分鐘到，個心忐忑不安，我同 Priscilla 可以話啱啱先有感覺，點知今日就要結束，既然無可能，又偏偏要遇上，大佬，你玩我咩！諗到入晒神，不知不覺 Priscilla 已經到咗，換上一條黑色連身裙，化咗一個淡淡嘅裝，明耀照人，我忍唔住上前緊緊拖住佢隻手，佢講笑咁講 






「你握得我那麼緊，害怕我會跑掉嗎？」 


「對！我真的怕妳會離開！」我好認真咁講 


發自內心嘅一句，Priscilla 聽到之後，雙眼不其然流起眼淚，

仆街喇！！ 






我嚇到不知所措，手忙腳亂咁，立即遞上紙巾，跟住講 


「對不起，對不起，我說錯了話！」 


佢見我咁慌張，亦強忍淚水咁講 


「我沒事，對不起！」 


呢餐飯大家都食得好唔開心，亦都無乜出聲，因為我地都知道即將要分開，雖然唔捨得，但我又可以點呀，唔通同佢講，唔好走住，玩多幾日咩，咪傻啦！時間一分一秒咁過，我終於忍唔住問佢 






「我可不可以送你到機場？」 


「不 …… 用了！」她眼紅紅咁話 


我都明白送到機場又點吖，咪喊得仲犀利，仲唔捨得，既然係咁，我就响張餐紙上，寫上我嘅地址、電話同電郵，再响右下角畫咗一個笑面公仔，而佢亦都寫低聯絡方法比我，我好好咁收埋响銀包，唔知仲有無機會再見面，起碼可以作為一個纪念同回憶。 


我地拖住手咁離開餐廳，慢慢行番上房，幾慢都好，都有到達終點嘅一刻，臨別依依，Priscilla 早已哭成淚人，我上前擁抱住 Priscilla ，佢嘅眼淚仍然不停咁流，一個擁吻，我就同佢講 


「再見，一定會再次相見！」 






呢一刻 Priscilla 已經喊到講唔到嘢，雙手遮住塊面，只能夠點頭回應，發展成咁，我個心一啲都唔好過，我望住 Priscilla，亦強忍眼淚，响佢額頭上輕輕錫咗下，就轉身離開，無再望番轉頭，淨係聽到飲泣聲充滿整個走廊 ……