《印度 · 尋油 · 台灣妹》: 《五》

"咕嚕 ~ 咕嚕 ~ 咕嚕 ……"


個肚又唔爭氣，抬頭望見個鐘已經八點幾，坐足成日都未食過餐好嘅，花仔強聽到我打晒鼓，就毫不留情一野伸落我度，化身成魔鬼教練咁講


「 呢位學員，肚餓就起身啦！落樓下食完野先死番黎瞓！」


「YES SIR，阿蛇，頭先救你一命，呢餐你嘅！」我一邊起身一邊講






「……………………」 花仔強無言，跟住大家哈哈大笑，換件衫就行。


餐廳位於大堂樓下，同大堂一樣咁光猛，中間位置係一張超大四方形Bar枱，每邊各有四張櫈，我地坐咗响近門一邊，花仔強話要去廁所，叫我睇下食乜先。


過咗一陣，花仔強笑淫淫咁行番嚟，仲一手拉咗我起身，我問咩事，佢只笑而不語，去到餐廳另一邊，較後位置有張方形枱，見有兩個女仔坐咗响度食嘢，我地禮貌上打咗個招呼就坐底，花仔強就用普通話講






「我再次介紹自己，我叫 PENNY！我朋友叫 Da Vinci，我地來自香港，剛剛到埗！」


「妳們好！」我尷尷尬尬咁講


"乜野 Da Vinci （達文西）呀？仆街仔，玩野呀！" 我心諗






兩位靚女都好有禮貌咁自我介紹，坐我對面長髮嘅叫 Priscilla，嗰樣真係有啲似翠如BB，另外短髮果位叫 Heidi，斯斯文文，佢地嚟自台灣，啱啱大學畢業，仲未搵到野做，話印度比人感覺好神秘、好特別，所以兩個女仔膽粗粗就嚟旅行。花仔強當然唔會放過呢個機會啦，大講笑話，扮鬼扮馬，氹到兩個靚女鬼死咁開心，又話識睇掌，又話識摸骨，乘機抽水，小弟真係佩服到五體投地！


大家食完飯，飲咗兩杯，花仔強提意聽日一齊去觀光，話多人一齊玩開心啲，又安全啲，仲約聽朝九點一齊食早餐，兩位靚女都話好。飯後，我地好有風度咁送咗佢地番房先，我問花仔強


「以你份人無理由唔即食㗎！」


「今日咁攰，又約咗聽日一齊玩，駛乜急，你估佢地走得甩我五指山咩，哈哈 …… ！」 花仔以一副權威博士口吻咁講


「果然係老手！陰莖，陰莖！」我扮晒稱讚






「屌！講呢啲， Da Vinci！」 佢隨即答


「仆街仔！」大家一齊大笑，搭住膊頭行番上房瞓。沖完涼，刷埋牙，臨瞓前我好奇咁問花仔


「死仔，究竟你嚟印度做乜？以我識你咁耐，睇寺、觀光最多咪配菜！」


「遲 ……多兩日你咪知 …… 囉！」 花仔講完之後就瞓咗


「咁神秘？」