《印度 · 尋油 · 台灣妹》: 《四》

「借借！！」 我比一把女聲嘈醒，望一望周圍，見到啲乘客企晒响身，開始攞行李，原來飛機已經降落咗新加坡機場，我拍一拍花仔強，示意佢知要落機。


「借開！！」 隔離個傻婆極之唔耐煩咁講


又唔知黐咗邊條線，都係唔好刺激佢，費事麻煩，我地唯有好無奈咁起身讓路，當佢行出去果刻，忽然自言自語咁講


「兩條死淫蟲！」






我同花仔強對望一眼，但無出聲，等個傻婆完全離開視線範圍後，我就同花仔強講


「嗱嗱嗱，無呃你啦，救你一命喇，抵請食飯喇啩？！」


「多撚謝你囉！唉 …… 估唔到咁靚女，原來真係傻嘅，慳撚晒！ 」花仔強語帶失落，跟住我地就一齊落機，去搵地方轉機。






戆居居响新加坡等咗兩個鐘先轉到機，期間花仔仍然好努力咁覓食，不過都係空手而回，再坐多三個零鐘，終於抵達印度嘅新德里機場。


望一望錶，已經晚上七點幾，過完關，攞埋行李，步出大堂，嘩 ~ 我有無去錯地方呀？呢度印度？乜個機場咁新淨嘅，向上一望，金光閃閃，一個又一個金色圓形掛滿牆上，當中夾雜咗好多唔同形態嘅大手掌，感覺好新鮮，好特別，花仔就叫我跟住佢行，沿途仲有好多印度色彩嘅裝飾，連廁所門都印有一對印度男女嘅容貌，除非發雞盲，ࢂ 唔係嘅話，你點都唔會入錯。


向前行，見到一個中年印度男人，滿面鬍鬚，舉住一個大紙牌，上面竟然寫住花仔強個英文名 ，花仔強見到就揮揮手，個中年男人立即上前迎接，面帶笑容咁將行李拉走，然後講咗句唔太準嘅英文，就示意我地跟住佢行，出到機場就上咗架私家車，我問花仔強






「你訂咗間咩酒店？」


「講你都唔識㗎啦，好快就到，總之一定有驚喜！」佢串貢貢咁講


「挑，懶神秘，巴之閉！」我講完之後，無再理佢，望出車外，又無乜風景可言，都係一啲低層舊式建築物，同新機場有好強烈對比，大約行咗十零分鐘，架車漸漸行上一個小山坡，然後停低，司機落車，開門比我地，我抬頭一望，


嘩 ~~~~~~


印度竟然有一間咁鬼死靚嘅酒店，真係估佢唔到，呆咗幾秒先慢慢行入大堂，點知失驚無神有兩支槍指住我同花仔，當堂窒一窒，睇清楚啲，兩個著住黑色制服疑似保安嘅男人，一直指住我地，唔知佢地想點，喺度講啲唔清唔楚嘅英文，好彩司機先生幫手，佢話印度治安麻麻，入酒店前一定要檢查行李同搜身先可以入。






“大佬，我明白你地職責所在，但我嚟旅行唔駛用碌大炮隊住我嘅，一陣走火咪無仇報，你地揸住碌炮已經贏晒啦，唔通我仲可以反抗咩！“ 我心諗


檢查完，我同花仔正式踏入酒店，一睇，個大堂好光猛，純白色嘅地板，配紅色地毯，中間放咗個紅色圓形擺設，而四邊就係落地玻璃，玻璃與玻璃之間有銀色三角柱相距，好鬼華麗，向窗外望，係一個足球場咁大嘅水池，水池盡頭有兩座兩層高嘅建築物，外形四四方方 兼且都係落地玻璃，响漆黑嘅環境下，更覺吸引！


不知不覺行到服務台，一位笑容親切嘅女職員要求我地出示證件，辦理完手續，由另一位服務員帶我地番房，所有房間都係响大堂盡頭左手邊果座建築物，外形呈長方體，樓高六層，我地住四樓，入到房，見到兩張單人床，一張紅色雙人梳化，同埋一般房間設施， 簡簡單單，白配紅色，比人一種好潮嘅感覺。


長途跋涉咗成十個鐘先到，見到張咁舒服嘅床，我已經忍唔住成條生魚咁撻咗落去，郁都唔想郁，爽呀！點知 .....