[浪漫甜故] 二月十四日, 我居然破咗中學靚女 Miss 個處: 第六章

終於都行到番去 Miss Chan 屋企樓下度, Miss Chan 鬆開咗呀俊隻手, 但就正好唔自然咁撥住頭髮就話 : 「吳英俊…., 夜嘞, 我….自己番上去就得架嘞。」
 
呀俊正依依不捨咁望住 Miss Chan 黎講 : 「咁好啦, 聽朝我會….. (忽然好大聲) 咦, 我係咪仲未幫妳推番開個衣柜呀?」
 
Miss Chan 再講 : 「你知就好啦, 頭先又走都走唔切咁, 我仲諗緊今晚自己要點推先至可以入倒廁所呀。」
 
呀俊同 Miss Chan 又再上番樓之後, 跟住呀俊好快就幫 Miss 推開咗個衣柜, 呀俊轉身望吓 Miss Chan 嘅時候, 見佢正坐響梳化度呆望住佢咁。
 

 


Miss Chan 問住呀俊 : 「喂, 今晚都聽唔倒你個電話有響過嘅, 咩你真係無女朋友架?」
 
呀俊聽倒咁, 即時心諗好彩今晚將個電話較咗做靜音, 因為頭先裝過個電話今晚有成十幾個女仔嘅未接來電。
 
呀俊再同 Miss Chan 講 : 「唉, 我哋做呢行嘅, 香港啲女仔邊度會鍾意我哋吖, 就好似 Miss 頭先妳咁講, 妳都話要我讀番多啲書去轉行咁一樣嫌棄我係做油漆仔啦。」
 
Miss Chan 好緊張咁企咗起身行去呀俊面前拉住佢手臂黎講 : 「唔係呀, 你唔好誤會呀, 我頭先唔係咁嘅意思架。」
 
呀俊扁住咀咁講 : 「得架嘞, 我明嘅, 我都知 Miss 妳絕對唔會好似果啲港女咁睇唔起人嘅。」
 


Miss Chan 好似如釋重負咁再講 : 「唔, 咁你明白就最好啦。」
 
呀俊曲低個膝咁同 Miss Chan 講 : 「喂, 咩妳認真架? 我同妳講吓笑咋, 哈哈哈, 其實我搵嘅錢分分鐘仲多過坐寫字樓果班文員仔啦, 所以我點又會自卑咁呢?」
 
見 Miss Chan 突然之間好似靜咗落黎咁, 跟住就緩緩咁坐咗響個地吓度。
 

 
Miss Chan 開始好細細聲咁講 : 「吳英俊, Miss 今日真係好開心呀, 因為我都已經好耐無試過放假有人陪我傾咗成日偈架, 其實 Miss 唔係唔想搵人去拍拖, 不過 Miss 真係唔敢亂咁接受一啲唔熟嘅人向我追求, 而且我又唔知佢哋個心究竟係響度諗緊啲咩….」
 


呀俊諗咗一陣就話 : 「咁 Miss 妳又太過保護自己嘞, 妳要記住, 妳嘅階層果啲好男人唔似得我哋咁口花, 佢哋啲人好薄皮架咋, 人哋可能要谷咗成個禮拜勇氣先敢向妳開口黎表白, 但點知比妳一嘢拒絕就打沉咗佢哋, 嗱, 啲機會咪咁就無咗囉。」 呀俊求戀其其隨口 up 啲嘢出黎講。
 
但 Miss Chan 聽倒之後就話 : 「係呀, 我試過真係有一兩個男人向我表示, 但又真係比我婉拒咗佢哋之後, 跟住從此佢哋就唔敢再接近我嘞。」
 
嘩, 咁都中? 呀俊跟住食住上再講 : 「咪咁就係囉, 都未曾試過響埋一齊就落定閘先, 嗱 Miss, 女性最緊要就係 20 至 30 歲呢個黃金十年呀, 妳試吓比番啲信心自己, 唔好等到人老珠黃果陣先識得去後悔呀, Miss, 三思呀。」
 
Miss Chan 開始有番啲笑容再講 : 「蝦, 吳英俊其實你都幾叻過喎, 不過我覺得你話無女朋友就一定係呃我嘅。」
 
呀俊再講 : 「咁我今日真係無吖嗎。」