關於少女的故事: 21-童話

幾日之後，我登入跑Online，就彈出個提示。

「與 曉晴ovo 的情侶關係結束了。」

但係之後我見到譚越其原來都有玩跑，仲add左我friend。

然後我係Friend List度搵出「越其ovo」，再禁一下「一起跑步」。

點知就去左佢個農場，原來仲舉行緊婚禮。佢同劉曉晴係跑Online度結婚！





譚越其係跑度用納魯，劉曉晴用莉娜，而肥輝就用大隻仔，宇宙用光光，于夏君同我一樣都係用明明。

譚越其仲係跑度送左個邀請函俾我，可以用黎換禮物。

肥輝主持個婚禮，講：「劉曉晴，譚越其，你地係咪願意由今日開始，無論順境或逆境，富有或貧窮，健康或疾病，都會愛對方，永遠係埋一齊？」

劉，譚：「我願意。」

我同眾人：「恭喜～」





我好羨慕，同心愛既人係遊戲入面結婚，究竟係點樣既心情呢？

結婚儀式完左，我地一班人係農場度跑跑跳跳同跳舞。

仿佛係係童話世界入面既一場盛宴。



跟住，有段小插曲，中二果年，我屋企養果隻貓過左身。





一開始知道永遠再見唔到佢既時候，我郁啲就喊，仲喊到九彩。

雖然佢好臭，又成日踩到啲屎周圍係，又抓爛哂張梳化，但係我始終好愛佢，佢由細到大咁陪住我，無左佢既日子真係好難過，日日都好掛住佢。

望住佢個空左既食物兜，又再想起永遠都睇唔到佢食野食到jap jap jap咁既樣，我又開始淚崩。

摸住梳化上同牆上既抓痕，就好想摸佢既小手。

我唔明白，點解人要面對悲歡離合？上天點解要我地受離別之苦？

爸爸見我咁唔開心，跟住就帶左我落元朗搵寵物店。

行勻哂啲寵物店，啲貓都好cute，但係就無一隻似我隻「小雲」。

小雲係貓女，係我出世之前爸爸買返黎既英國短毛貓。





貓貓既頭其實好好摸，係毛公仔比唔上既質感。

最後，我地買左另一隻貓代替小雲。

佢叫「小徹」，果時係隻五個月大既貓公。

但貓好似人咁，每個都係獨一無二，根本無可能替代到。

只不過係籍由新既感情，去忘記舊既感情。

果一年，我無左隻貓，無左劉曉晴，愛情亦失意，簡直係我既人生低谷。







話說，我地調左位，座位大兜亂之後，但鄭熙龍依然坐係我後面，仲成日抆我條辮。

真係好討厭，但又做唔到啲咩阻止佢。

我問肥輝點算，佢竟然話鄭熙龍鍾意我，先至會咁對我。

真係唔知男仔點解會有咁既心態。

諗起上次True or Dare，鄭熙龍話鍾意既人係圈入面，我諗，都有八、九成係我啦。

算啦，唔理啦。

打開Facebook，發現劉曉晴Unfriend左我。

做朋友做到咁，真係好sad，唉。





或者女仔就係咁，有異性無人性。

一年容易又聖誕，又到冬至，聖誕聯歡。

我地食完野，就玩集體遊戲。

仲記得果次玩爭櫈仔，玩到最後，得返我同劉曉晴爭一張櫈仔。

播放住既音樂一停，我就同佢鬥快坐低。

劉曉晴當仁不讓，好似當正張櫈仔係譚越其咁，一野用個pat pat撞埋黎，我仲跌到tim。

鄭熙龍即刻問我有無事，我就話無事啦。





不過劉曉晴就係咁贏左呢場「爭櫈仔」。