關於少女的故事: 20-絕交

======續 劉曉晴視角======

雖然只係玩遊戲，輕輕咁一吻黃寶靈，但係我見到都係好唔開心。

譚越其仲要係毫無猶豫咁揀左黃寶靈。如果佢錫既係于夏君，我諗我都唔會咁唔開心。

同左譚越其一齊成八個月，但我唔係傻嫁，我一早感覺到佢個心仲有黃寶靈。

所以秋季旅行兩日之後，我同譚越其提出左分手，但佢竟然留都唔留下我，跟住我就崩潰左係咁喊。





我打左俾于夏君訴苦，一路喊，一路講。

黃寶靈係我最好既朋友，但係唔知由幾時開始，我地之間變得好陌生，成日都要透過于夏君做中間人。

特別係秋季旅行之後，我地班調左位，我同黃寶靈各散東西。

人際關係要好既時候，所有距離都可以克服，但人際關係決裂既時候，所有距離都成為問題。

如果要我係譚越其同黃寶靈之間揀一個，即係愛情同友情二揀一，我諗我真係揀唔落手。





最好，就係兩個都唔要。

人與人之間既關係，就好似玻璃。

破碎左之後，就算勉強修補，都會清清楚楚咁留下裂縫。



======恢復到 黃寶靈視角======





唉，秋季旅行之後，劉曉晴就對我好冷淡。跑Online又無玩，Msn又唔應機。

有一日，我同譚越其係Msn度傾計。

我：「你氹返劉曉晴未呀？」

佢：「氹左啦，我問佢一齊返好唔好？佢死都話唔要。」

我：「就咁問？你俾D誠意得唔得呀？」

佢：「係呀，唔係應該點做？」

我：「你識唔識整蛋糕呀？或者送花呢？」

佢：「唔識呀，送花就可以。」





我：「咁你買紅玫瑰啦，佢應該鍾意嫁。」

我：「千其唔好話係我叫你送花嫁喎，如果唔係佢應該仲嬲。」

佢：「知道啦。」

好啦咁，唯有等你好消息。

點知過左兩日，不幸既事情又發生。

譚越其話，劉曉晴問佢係咪我教佢送花既，佢一時口快快話左「係，丫，唔係。」，跟住劉曉晴仲掉低紮花走左去。







唉，譚越其，真係俾你激死。教你氹返劉曉晴反而變左雪上加霜。

或者，叫佢拎枝花去溝新女，仲容易過拎枝花去箍煲。

之後我拉佢出課室，一五一十咁講清楚。

我：「譚越其，其實你係咪仲鍾意我呀？」

譚：「唔係啦，同劉曉晴經過八個月既感情，我係真心鍾意佢嫁。」

我：「咁就得啦。你同佢解釋清楚你同我之間既關係，只係朋友咁簡單就得啦。」

後尾過左兩日，佢地終於係返埋一齊，睇黎劉曉晴終於嬲完佢，但係依然對我不瞅不睬。

作為女仔，有種直覺，我覺得我地既友誼已經玩完。如果我再解釋同譚越其既關係，只會越描越黑。





我地既關係早生芥蒂。

女仔之間既友情真係好脆弱，為左佢做九十九次討好佢既事，都可以因為一次唔討好佢既事而抹殺所有。

我整既生日蛋糕、生日卡、生日禮物，一切心血都付諸流水吧。

一年幾既感情，話斷就斷，真係好唔值得。