關於少女的故事: 10-欲擒故縱

杜學禮：「唔關我事嫁，等我仲諗住幫你追佢tim。」

我：「咩話？你可以點幫我呀？」

杜學禮：「欲擒故縱，你同佢混熟左一排之後，你試下突然消失，睇下會點。」

我：「係咪真係得嫁？」

杜學禮：「如果咁都唔得既話，我會勸你放棄。」





我：「咁咪姐係背水一戰？」

杜學禮：「可以咁講。」

我：「話時話，你做咩係二樓嫁？」

杜學禮：「陣間中文堂，我地單數學號既要轉課室，黎二樓上堂呀。」

我：「係喎。」我學號係雙數，唔駛轉課室。





就係咁，杜學禮成為第四個知道我鍾意陳宇宙既人，仲話要幫我諗計仔追陳宇宙。

有人話，女仔追男仔一定要耍少少心計，呢點我都認同。

尤其係對住陳宇宙呢D咁蠢既男仔，真係要俾多兩錢肉緊。

唉。宇宙呀，宇宙，究竟我要點做，你先明白我對你既心意呀？







最後，我選擇左用杜學禮既「欲擒故縱」策略。

首先，我日日同佢一齊玩跑或者msn，玩左一星期左右，等佢習慣左有我既日子。

然後某一日，我特登隱藏自己，係msn假裝Offline，亦無上跑Online。

跟住我派劉曉晴同李永輝幫我睇下陳宇宙會點啦。

有日，我放左學就去劉曉晴屋企，睇住佢用佢個ac玩跑。

無耐，宇宙就入左傾場問佢地：「Bonnie呢？」

宇宙：「呢排佢去左邊？跑Online都無上。」

劉曉晴：「唔知喎，你掛住人地呀？」





果然奏效！

宇宙：「…唔係呀，問下姐。」

黎啦！等你感受下思念人既感覺啦。

果日，我係劉曉晴屋企玩，佢仲幫我分析而家既情勢，叫我不如扮有男仔追，等陳宇宙著緊D。

追仔攻略，第一招：「欲擒故縱」，第二招：「假想敵」。

劉曉晴：「最近好似有男仔追佢喎。」

宇宙：「下？係咪譚越其呀？」





呢一下，唔止震動我個心，仲震動一切。



我望到「譚越其」呢三隻字，即刻呆左係度。

而劉曉晴個反應仲更加緊要，呆左三秒之後先識得打字。

劉曉晴：「下？譚越其鍾意佢咩？」

宇宙：「唔知呀，我估下咋嘛。」

劉曉晴：「點解你會估佢既？」

宇宙：「因為譚越其同我提起過佢。」





我即刻禁住劉曉晴膊頭講：「唔好誤會呀，我同譚越其無野嫁。」

我地只不過係有時傾下計咁咋。

劉曉晴若有所思咁回答左我一句：「哦。」

宇宙：「咁，唔係譚越其既話，會係邊個追佢？」

劉曉晴：「杜學禮。」杜學禮就係咁幫我食左隻死貓。

宇宙：「唔識。」

劉曉晴：「我地1C班嫁。」





宇宙：「原來係咁。」