關於少女的故事: 09-心意

有時候，個天可能真係會聽人既祈禱。

Emma同宇宙終於都散左，分手啦。兩個人係Facebook Status都變返做「單身中」，而果日係二月十號。

跟住我就逼不及待咁去搵陳宇宙啦。

我Facebook Inbox問佢：「你分左手？有無事呀？」

佢：「無事，唔駛擔心我。」





我：「有咩事可以同我講喎。」

佢：「哦。」

佢：「之前好對唔住呀，Emma唔鍾意我同其他女仔玩，所以忽略左你。」

我記得，佢甚至用你Msn同我講野，叫我唔好搵你tim。

我：「唔緊要啦。」





佢地分左手，我真係好開心，因為代表住我有機會啦。

我：「同我玩陣跑Online丫，好唔好？」

佢：「好呀，我都好耐無玩。」

於是乎，我地成班friend就一齊玩跑Online，真係好開心。







又到左家政堂，今次學整三色椒炒意粉。終於又可以送野食俾宇宙。

肥輝見到之後又稍有微言：「車，掛住溫仔，有好野食都唔益我。」

劉曉晴：「你仲嫌自己唔夠肥呀？食完肥死你呀。」

李永輝呢個肥仔漸漸變左我地其中一個「姊妹」。

異性朋友friend到一個地埗，甚至會覺得對方係同性。

不過今次宇宙話唔鍾意食三色椒，所以我就留返俾肥輝食。

肥輝：「多謝咯。」

時間去到二月十四，情人節，我決定整朱古力送俾宇宙，然後表白。





小息，劉曉晴推住我上二樓2C班。

我：「喂也，唔好推啦。」

劉曉晴將我推向陳宇宙既方向：「黃寶靈有野同你講呀。」

我個心七上八落，小鹿亂撞，唔知講咩好。

我：「我呀…我整左D朱古力呀，你試下呀。」

「其實我鍾意左你好耐啦。」呢句說話我始終講唔出口。







宇宙：「多謝喎。仲有咩想同我講呀？」

唉，宇宙呀，宇宙，我係情人節送朱古力俾你已經係好大既暗示啦，點解你仲唔明喎？

唔通真係要我講到明我鍾意你咩？

我：「無呀，今日天氣幾好咁。」

無鬼用呀你，黃寶靈，「我鍾意你。」呢四隻字都講唔出口。

劉曉晴用力捏我的手，想逼我表白，但我依然無視她。

宇宙：「係呀。」

我：「無野啦，拜拜。」





宇宙：「拜拜。」我地跟住擰轉頭就走。

點知見到杜學禮係度竊笑，我就行埋去問：「笑咩笑？」

杜學禮：「無呀，我見到有人食檸檬咋嘛。」

我：「咩食檸檬呀？」

杜學禮：「你囉，情人節送朱古力都無行。」

我：「……關你咩事喎？」

點解連旁人都了解我既心意，但你偏偏唔明白喎？