關於少女的故事: 07-哭泣

其實我原本諗住去到聖誕節之前，有D氣氛先至同陳汝州表白。

但無諗到11月都未完，陳汝州就同左第二個女人一齊。

感覺就好似打麻雀咁，俾人截糊一樣。

我果幾日既心情，簡直係跌左落谷底。

秋季旅行，我地去左新娘潭燒野食。





我仲記得宇宙好鍾意食雞翼，所以無意中自己都燒左好多隻雞翼。

鍾意人既特徵之九：佢鍾意既野，自己都會慢慢鍾意。

食食下，諗起宇宙同左Emma一齊，我就好唔開心，忍唔住喊左出黎。

我：「嗚……」

劉曉晴：「唔好咁啦，仔死仔還在，下個更可愛呀。」佢掃住我背脊講。





李永輝：「係囉，唔好喊啦。」但聽完呢句，更加想喊。

我竟然抱住劉曉晴係度爆喊。

我：「宇宙同左Emma一齊呀，嗚…」我愈喊愈大聲。

周圍既人都注意到我係度喊，感覺好醜怪。







跟住班主任Miss Chan都走左埋黎，問：「係咪有咩事呀？黃寶靈。」

唔通我話自己失戀咁樣衰咩，所以我咪話我隻腳咬柴囉。

Miss Chan：「俾我幫你睇下？」

我：「唔駛啦，我無事啦。」我拭乾眼淚，故作淡定。

Miss Chan：「有事既話叫我丫，唔好忍喎。」

我：「好。」

我鍾意陳汝州呢個秘密，得我、劉曉晴、于夏君同李永輝知道。

即係多數圍住我，睇住我喊既觀眾都唔知發生咩事。





唯獨是有一個男仔好似睇穿我咁，佢過左埋黎同我講野。

「唔好咁啦，俾仔飛好閒姐，最多我聽你講心事啦。」

同緊我講野果個男仔叫杜學禮，係我地班一個唔起眼既男仔。

我：「我都話我無野咯。」

杜學禮：「係至好喎。」

劉曉晴：「你俾佢靜下啦。」







如是者，我喊左幾日，終於唔喊。

而跑Online果方面，宇宙都無on好耐。

仲記得玩跑Online，有一種場叫做「傾場」，意思即係只係入場傾計，唔會開波跑步既場。

我開左個傾場，做左場主。場名叫做「我失戀呀」。

劉曉晴同李永輝都有玩跑，佢地仲入左黎，陪我一齊傾計。

之後佢地係咁禁f2，打句「加油～加油～」出黎。

仲係Game度一齊跳舞tim。

劉曉晴忽然話：「你係好女仔黎，係陳宇宙唔識欣賞咋。」





劉曉晴：「如果我係男仔，我一定會要你嫁。」

我：「多謝你呀:'( 」

果陣時跑Online有情侶系統，原本諗住同宇宙一齊既時候用。

不過，而家變左同劉曉晴登記做情侶。

在旁睇住既李永輝睇到之後打左句：「咦！你地Les嫁？」

好朋友好到一個地埗，的確係會令人懷疑自己係咪同性戀。

有時候，最好既陪伴並唔係千言萬語，而是一聲不響，伴隨左右。