關於少女的故事: 02-喜歡

呢個時候，有個人正係跑道既起點上做緊熱身運動，佢個樣有D似韓星朴寶劍，佢叫做譚越其，係劉曉晴既暗戀對象。

司令台嗌咪：「而家要舉行既係男子丙組一百一十米跨欄俓賽，各位參賽者各就各位……」

我：「喂，你睇下，你個譚越其要跑啦。」

譚越其又係黃社，不過就讀隔離班1D班。

「三，二，一，咇！！！」





我地啦啦隊跟住就嗌口號：「Yellow House，啪啪啪！」

我隔離既劉曉晴仲嗌得聲嘶力竭：「Yellow House，啪啪啪！」

「Yellow House，啪啪啪！」譚越其仿似飛人，飛快跨過一個又一個欄柵，拋離一眾對手，脫穎而出。

毫無懸念，譚越其攞左第一名。

「Woo！」譚越其為我地黃社爭取到3分，大家都好高興。





到頒獎完畢之後，佢又係竟然第一時間同Emma影相。

Emma搭住佢膊頭，個胸仲貼住譚越其隻手，究竟有何居心？

劉曉晴即刻翻了一大個白眼。



有人話：兩個女仔之所以做到朋友，係因為有一個共同敵人。





而我諗，曉晴同我既共同敵人就係啦啦隊長Emma。

我地淨係知佢讀4B班，中文名叫做王心瑜，而且佢好似好鍾意年紀細過佢既師弟。

呢個時候，我竟然擔心Emma會搶走陳汝州。

呢一秒，我意識到自己真係鍾意左陳汝州，因為我竟然呷醋。

所謂一見鍾情，原來真係咁簡單？

當時陳汝州在跑道上回眸，那一副俊俏的臉，令我非常難忘。

眼大鼻高，同李治廷差唔多咁靚仔。

陸運會完左之後，我即刻返屋企開電腦，上學校網站睇下今年既分班名單，終於俾我搵到：2C班24號，陳汝州，Chan Yu Chow。





陳汝州，陳汝州，究竟係咩野名黎，咁特別既？

我攞左張白紙，係度寫佢個名，係咁寫，係咁寫。

寫完佢個名，我又寫自己個名係隔離：「黃寶靈」。

我心諗，如果我嫁左俾佢，我咪叫做「陳黃寶靈」囉？

鍾意一個人既特徵之一：係咁重覆寫對方個名。

二：將對方個名同自己個名寫埋一齊。

三：幻想結婚後女方既姓名。







我張白紙已經寫滿哂我同陳汝州既名，寫完之後先覺得呢個係我鍾意佢既罪證黎，所以跟住我立刻撕碎張紙。

陸運會過左唔知幾多日之後，劉曉晴竟然自發話要幫我攞到陳汝州既Msn。

果一日，有家政堂，老師教完我地整曲奇之後，我整左好多。去到小息既時候，劉曉晴拉住我隻手，要我跟佢上二樓，準備一探2C班。

劉曉晴敲門大叫：「唔該，我想搵陳汝州呀。」

霎時間，整個2C班一片死寂，兩秒後，同學竟然起哄。

有個傻仔大叫：「Woo！又有囡囡黎搵宇宙啦。」

「宇宙？」哦，我明啦，係汝州既諧音，原來佢花名叫宇宙。





陳汝州聽到之後行左出黎，一臉疑惑咁望住我地。

死啦，個心好亂，跳得好快。

劉曉晴：「拿！我叫劉曉晴，佢叫黃寶靈，D曲奇係佢整既，你試下。」跟住遞上一袋我親手整既曲奇。

陳汝州：「哦，多謝喎。」

劉曉晴：「你介唔介意俾個Msn我地，我地做個朋友呀。」

陳汝州：「好呀，[email protected]」

劉曉晴：「咁好啦，無野啦，拜拜。」





陳汝州：「哦，拜拜！」

估唔到咁順利，索取Msn大作戰，大成功。