「如果可以，我想繼續同外星人談戀愛」: 第二章
第一次永遠係最難忘，我地嘅第一次⋯發生係郊野公園張長凳到⋯個陣好靜無咩人，
有幾片落葉，有陣陣風吹過，我聞到係秋天嘅味道。
我地第一個Kiss就係呢到發生，三年無拍拖無Kiss過人，
突如其來有啲唔慣但個一刻我覺得個世界靜止左，得返我地兩個。
另一個第一次⋯發生係港鐵站入面⋯⋯唔好心邪！係講緊我地第一次嗌交啊！如果真係個樣野⋯上左蘋X動啦。
第一次嗌交，我都唔記得咩原因了，淨係記得你不斷喊，我就木無表情咁遞紙巾俾你，
另一隻手默默食緊東X堂個卷，仲問你食唔食。可能你地會覺得我好無人性，但係岩岩放工嘅我真係好肚餓，
容許我先醫好肚再醫隔離個位外星人。
我覺得嗌交真係世界上其中一樣最浪費時間嘅事，我覺得求其嗌幾句為平淡嘅感情添上一啲色彩，
無疑係可以提升感情，但係嗌到一發不可收拾又分手又打交又盛就無謂啦⋯傷身又傷心。
人生第一次去聽Jazz⋯我差啲瞓著左，唔係我唔識欣賞音樂，係我天生對音樂少左條根，我真係捨命陪君子，
但原來外星人都話：點解同我之前聽個啲Jazz唔同嘅⋯⋯點解同我想像中咁唔同嘅⋯⋯不過你話你想聽我先陪你咋！我真係冷笑一聲心入面反左十個白眼再溫柔咁問我地幾點走啊？早少少走去食野啦。
寧願食十次野都唔想再聽一次馬拉松式嘅Jazz!!有Jazz控嘅人請原諒我，唔好批鬥我。
同外星人有好多個第一次，亦都因為外星人，帶我返去簡單嘅世界，
係外星人提醒返我要對人善良，提醒返我對社會唔應該咁冷漠。
同時帶俾我好多新思維新衝擊新思想，雖然有時係幾離地，但係現實社會生存，
偶爾來個離地嘅想像空間，就好像在密集人口無空氣的環境中，伸出一支超長吸管吸幾口氧氣，才得以生存下去，
多謝你外星人。