「如果可以，我想繼續同外星人談戀愛」: 第一章
2月3號，係我地第一次出街，係出街之前，我地每日都會講電話而且氣氛良好，我心諗應該有機掛?
第一次見面，第一眼望到你對眼，就被吸引住，好耐無見過一對清澈無雜質嘅眼睛，好似清泉咁⋯⋯
諗諗下就行到華嫂冰室，個日食嘅野係咩味我已經唔記得，因為掛住偷望你。
食完野，我地由駱克道行到去康山道，而家諗返都覺得累，個日好凍仲要行海旁，
我有問你洗唔洗搭車啊你攰唔攰？你話唔洗啦行下都OK。
然後而家一齊左之後每次行海旁你都會話好凍呀入番室內啦！好攰呀要行咁耐搭車啦！
（點解好似變左第二個人咁⋯⋯不過外星人係咁善變架啦⋯⋯）
仲記得個日你問我點解會識得行嘅？
我：係人都識架啦，唔通你唔係人類？之後發現原來你個思維真係唔係人類⋯⋯
行左唔知幾多萬步行左幾多個鐘，終於去到戲院睇戲，個日我地睇左套爛片，
我：係咪讀電影嘅人揀親都係爛片？
你：明明爛X茄評分幾高架喎⋯⋯
我：上網啲野都好信？緊係信自己啦！
你：係自己先唔可信！
我：但我信你一定會同我一齊！
你：但我唔信，一唔一齊到好快會知。
事實，最後係3月13號，我成功將外星人虜獲，我真係同左個外星人一齊。