【懸疑】《連登連環殺人事件》: —-第八章—- 1.
「你地到底困左佢喺邊？！」
連埋住在總部大堂大吵大嚷，一位警察公關正安撫著他。
「先生，呢一層我地唔方便透露。」
「我要探監啊，你唔透露我點探啊？」
「先生，由於你所提到既犯人係一個極度危險人物，所以我地幫唔到你。」
「有幾危險呢？就算危險都係我探啫！」
「對唔住先生，請你冷靜啲......」
「喂我好冷靜架喎，咁犯人都有人權架嘛，話唔定佢見完我之後，會講哂所有行兇過程呢？」
「我地警方會積極調查架喇，請你放心。」
「你叫我點放心啊？佢一個人孤零零困喺監獄，係好需要我既出現架。」
「先生，請不要諗太多。」
「咩叫唔好諗太多啊？佢可能好掛住我架！」
「先生......」
「你到底講完「先生」未啊！？」
結果，連埋住被公關耍了一大輪後，一肚子氣的步出警察總部。
什麼「積極調查」？
荒謬！
連埋住自從跟子熹他們爆出阿田是兇手後，心中一直內疚不安，而且對她的思念日益加重。
想到阿田當時獨自來到香港，那天真的樣子，連埋住深信她是受人主使的，案情並不簡單。
因此他很想從阿田口中得出真相。
但看著這群警察的臉，也知道他們想快點了結案件，草草了事。
哼，氣死人了。
求人不如求己，自己花心機調查出真相吧。
他走到附近的一家連鎖餐廳，打算喝杯咖啡，下一下火。
正值中午，餐廳幾乎滿座。
連埋住在某張二人桌坐下來，點了咖啡，隨手便掏出電話滑動。
按進了熱門區，只見討論話題變得娛樂化了。
什麼「人在香港，挑戰行路上廣州」、「終極大波港女（無圖）」、「一句講哂，港大定恆大？」......
關於連環殺人案的討論，只是過了兩星期，便通通石沉大海。
香港人，真的如此健忘嗎？
「一位？呢邊搭枱吖！」
聽到侍應遠處喊出一句後，一個男子從後經過，坐到他的前方。
連埋住隨便的望一望他，然後繼續玩手機。
欸？
等等。
他再看清楚一點眼前的人......
他不就是上次要脅我說出真話的休班警嗎？（這傢伙好像叫作康仔）
「喂唔好意思，你可唔可以去另一枱坐，我見到你就食唔落野。」連埋住單刀直入的跟他說。
康仔這才發現了他，眼裡頓時冒出不屑的眸光。
「點解要我讓你？你自己唔識坐去另一張枱？」
「我嚟呢度坐低先過你，當然應該係你走。」
「明明係你自找麻煩在先，仲好意思叫我走？」
「講起邊個先係麻煩，明明係你上次喺巴士上搵我麻煩在先喎！」
「點都好啦。」康仔心情不佳，不再想理會他：「果陣我做既事係為左查案，如果麻煩到你，咁咪Sorry囉。」說罷他向待應點了個午餐A。
連埋住見他態度不可一世，心中怒火猶然而起。
「就係多得你地呢啲求求其其既差佬，查單案都搞咁耐。而家阿田比人捉左，背後根本一定有人指使佢，你地又查啲唔查啲，諗住捉左個人交差就算......我做警察都做得好過你地啊！而家我唔靠你地喇，我自己去查出真相！」
康仔聽後訝異的盯著他，他的話迴盪在耳。
某程度上...
他說得一點也沒錯。
連埋住見他沒有反應，開口便說：「你唔肯走既話，我走！反正我都唔想望住個咁廢既警察食飯。」
連埋住留下半杯未喝的咖啡，逕自離去，剩下康仔一人呆呆的張著口。
他未有因為阿住刻薄的說話感到絲毫生氣，反之，他好像看到一顆閃動的星星，等待他去捕捉。
信中的文字掠過眸眼。
阿晴所說的「最意料不到既人」......
就是連埋住？
雖然他為人麻煩又討厭，可是他與自己抱著共同的信念，要找出案件的真相。
那麼，他便是我要找的人嗎？
「午餐A。」侍應放下一碟炒飯。
「唔食喇，埋單。」
康仔急急放下一張一百元，然後奔出餐廳外，侍應怔怔的目送他。
出到門外，他馬上發現連埋住，連埋住正準備搭上的士。
他想也不想，拼命的跑到的士前方，於它開出之際攔在車前。
剛起步的車子急忙剎停。
「嘟！！！！！！！！！」
的士立即響咹，司機從車窗伸出頭來大罵數句流利的髒話。
康仔趁機繞到車旁打開車門上車，然後若無其事的關門坐在連埋住旁邊。
司機和連埋住也錯愕的瞪望著他。
「做咩啫你？」連埋住驚怒。
「關於連登連環殺人案既事，我想你幫我手。」康仔正經道。
「哈...？幫手送你一程？」
「你聽我講先，我好認真架...」
「唔該你即刻落車，否則我影你相擺上連登。」他拿出手機鏡頭對著康仔。
「我想查出幕後既真正兇手。」
「要查既話你咪自己同班差佬去查飽佢囉。」連埋住把鏡頭湊到康仔臉前，拍了一個清晰的畫面。
「我已經唔再係警察。」
「哦！咁所以就無啦啦搵我，要我幫你？你當我傻架咩？」
「因為我聽到你頭先喺餐廳既說話，覺得你同我既信念好似。既然我地都係想知道真相，咁點解唔試下放低互相既仇恨，一齊調查呢？」
「連篇鬼話，搵鬼信你啊？」
「...你到底要點先肯信我？」
「你比個合理既理由我先得架！」
「咁樣都唔夠合理？」
「係啊！」
「點先叫合理啊！？」
「我點知你喎！諗唔到既就立即同我落......」
「因為我最愛既人比你最愛既人殺左啊！」
康仔激動的咆哮一句，打斷連埋住的話，把他嚇呆了。
車內頓時靜寂一片。
過了幾秒後，連埋住才徐徐的放下手機，收回口袋裡。
凝視著康仔混濁的眼瞳，裡面仿佛藏滿了悲傷的故事。
「你既意思係...其中一個受害既連登絲打（Sister），就係你既女朋友？」
康仔乏力的抬頭嘆氣，步入沉思。
「我唔知道算唔算係女朋友，到佢離開既一刻，我地都無確定過我地之間既關係。」
這樣一說，連埋住聯想起他與阿田之間，其實也沒有甚麼關係可言。
望著眼前這可悲的男人，連埋住感覺看到了自己一樣。
兩人不過皆是愛情上的失敗者吧。
既然放下仇怨，一起為真相奮鬥是個可行又有利的選擇，為何不試一試？
「好，我決定幫你。」連埋住說。
「嗯！」
「喂，你地兩個玩夠未啊？唔諗住搭車既話就走啦。」
的士司機不耐煩的問道。
「觀塘商業大廈，唔該。」