【懸疑】《連登連環殺人事件》: —-第六章—- 4.
「嘩，乜你間屋可以亂成咁既？」
甫入屋裏，康仔被一塌糊塗的環境嚇了一跳。
衣服鞋襪隨處掛放，傢具雜物擋在路上，飯桌放置了幾袋外賣膠盒，就連內褲胸罩也突兀地放在沙發上。
他萬般想不到，原來女生的家是可以這麼亂糟糟。
「咩喎，女仔既屋企就係咁架啦，係你咁毒唔知啫。」
「你咁唔企理，將來你結左婚之後老公點頂得你順啊？」
「呃...」
MK晴空想一會，續答。
「你講得有道理，咁你快啲幫我執屋啦！」
說罷她便一屁股坐在沙發上，把手機橫著拿，專心的玩手機遊戲。
「喂，邊有得咁架。就算要執，你都好應該幫手啦」康仔抗議。
「唔該你啦，我玩緊食雞啊，分唔到神。」
「食雞？我都有玩架喎。」食雞是最新款式的手機遊戲。
「咁你快啲執好野先，執完先凖玩！」
康仔唯有死死地氣工作，把衣服折疊收好，清理雜物，丟棄膠袋垃圾。
最後只剩沙發上的內衣褲，他拿著粉藍色的它們，不曉得怎樣處理。
MK晴瞥見康仔全神貫注的注視她的內衣，開口說：「點呀，如果你想索一啖既話我唔介意架喎。」
康仔臉蛋立即紅了。
「我先無咁變態，係唔知應該擺邊度咋嘛。」他把胸罩掉向MK晴。
MK晴咧嘴一笑，抓著胸罩放下手機，嫵媚的向他走去。
「咁你係咪想知道，應該擺邊度啊～？」
她誘惑地把胸罩豎立在康仔眼前，擺出憐愛的表情。
「我...係啊......」他發愣的說。
「好啦，咁我......」
猛地，MK晴把胸罩用力擠到他的臉上，康仔失措的嘩了一聲，倒後幾步。」
「哈哈哈哈！」MK晴開懷大笑起來。
「你玩我！」康仔丟走胸罩，捉住她的頭髮。
兩人又打鬧起來了。
黃昏時分，他們玩累了，決定一同走上天台，坐在膠櫈仔上欣賞坪洲景色。
泛白的天空，陽光打在金光色的海洋。
郁郁蔥蔥的樹草味道，平淡清幽的環境，令人心曠神怡。
康仔深呼吸，輕鬆的說：「如果以後每一日都可以係咁過就好喇。」
MK晴噤口不語，只是默默欣賞著晚光。
隔了一會，康仔又說：「不過我知道，呢一刻唔應該太放縱自己既心情，始終案件仲未完結。」
忽然，MK晴向他拋了一串鎖匙。
「喺破案之後，得閒幫我打理呢間屋可以嗎？」
「做咩啫你？」康仔斜視她一眼：「見我頭先打理得咁好，想要我嚟做鐘點工啊？」
「係啊，鬼叫你打掃得咁叻咩，住家好男人。」
「哼，好啦見你講野幾啱聽。」康仔笑著收起鎖匙。
MK晴笑笑。
抬頭看天，夕陽已經漸漸逝去。
金光閃閃的黃昏不知不覺間，慢慢換成寂寥的紫藍色天空。
她問：「記唔記得我講過，我地team入面有內鬼件事？」
「記得啊。」
「你覺得點？」
「我唔認同你既講法。」
「點解呢？」
康仔一五一十的告訴MK晴關於她離開以後發生的事，還有他們調查出來的結果。
「總括嚟講，兇手而家就已經查到係阿田，所以跟本無需要猜忌同伴。」
MK晴變得認真起來：「但係個兇手點解永遠都好似咁了解我地行蹤？而且總部命案既事，兇手要有我地team既人既電腦卡先開到門，事後我地之中又無人唔見左張卡。喺呢個情況下，你依然唔相信有內鬼？」
「我唔係想否認你既講法，不過我地識左咁多年既同伴之間，又點可能有個連環殺人犯？恕我唔能夠認同......」
「唔認同，抑或係唔敢認同我呢個假設？」
「呃，唔係...只係......」
這樣一說，康仔仿佛被蜜蜂刺了刺腦袋，支吾其詞。
「拿，係咪駁唔到先？我講既野並唔係毫無根據架。」MK晴自信滿滿的說。
康仔猶豫一會，續說：「好，就當我地真係有內鬼。咁你覺得，邊個人先係內鬼吖？」
「初時我覺得係子熹，但聽你講完總部兇案之後發生既事後，我覺得我地身邊每個人既機會都好大。」
「下？每個人都係？」
「先講子熹。佢當日喺阿宜既命案守備鬆懈，放左羅明亮入總部，已經非常可疑。另外記唔記得佢前女友件事？美玲兩年前被網絡欺凌，間接造成佢死亡既慘劇。子熹可能因此對連登仔懷恨在心，絕對有連環殺人動機。」
「但如果佢咁憎班連登仔，點解會揀兩年後先落手？」
「可能係組織殺人事件時，搵到志同道合既阿田，兩人諗住搞大單啲，整個轟動既連環殺人事件，所以推遲左計劃？」
「照你咁講。」康仔托腮：「美玲件事過左兩年，應該所有野都準備好哂啦。咁點解連環殺人案既頭三次兇案，子熹都依然身處日本唔喺香港？（仲要慢慢揀手信返嚟比我地）」
「有機會係日本果邊有重要既事要處理，所以初時只有阿田一人行兇？」
「如果子熹心思咁細密等左兩年，又點會唔等多陣等到返香港先，先至同阿田一齊行兇，令犯案過程更順利？」
MK晴想著也覺得有理。
「你懷疑子熹我都理解既，但係點解連其他人你都覺得有可疑？」康仔納悶。
「因為抽離一啲去睇件事，會睇到更清楚既畫面。」
「咁你睇到啲咩？」
她然後列出了每人可疑之處：
「芊芊喺快餐店兇案中，話自己昏迷之前見到一男一女身影，試問煙霧瀰漫又點可能睇到呢？」
「胡Sir自從連環殺人兇件開始，性情就變得飄忽，一時就嬲爆爆，一時又好頹廢，十分奇怪。」
「蘋果陳喺殺人案入面成功上位，明顯係得益者，居心叵測。」
「影姨雖然無特別疑點，但佢工作一向有個習慣，就係用黃色便箋記錄事情，而正正兇手就係習慣用便箋貼喺死者身上。」
「唯獨係你，傻下傻下，最無可疑。」
分祈完後，她盤腿而坐，雙瞳剪水的望向康仔。
康仔嘴巴大開，下巴快要掉下來，然後讚嘆的拍拍手掌。
「果然重案組既警察！」
MK晴頷首淺笑：「嘻嘻。」
「咁你快啲返嚟我地team，查出兇手查出內鬼，咁咪一天都光哂囉。」
「唔喇...」她答：「我諗我以後都唔會返去。」
「下，咁樣點得架！」
「無辦法，係命運既選擇。」
她想起了些甚麼似的，臉色黯然。
康仔站過去，半蹲捉住她的手：「無左你，我每日返工咪無人同我玩，你想悶死我咩？」
「咁你咪同其他人玩囉，子熹、芊芊、影姨......」
「你係咪有野隱瞞我？」他感覺到MK晴與平時不同。
「無......」
「真係無？」
「我只能講，有啲野你早啲知道左，對事件並唔會有幫助，而且大家都會唔開心。」她語重心長的道。
「做人點可以咁悲觀架？話唔定你同我分享，我可以幫你解決個困難呢？」
MK晴只是搖搖頭，把另一隻手疊在康仔手背上。
「我想開開心心咁過呢晚，以後既日子，即使我要孤身上路，亦都無所謂了。」
「無論你去到邊，就算係地獄，我都唔會放低你一個唔理架！」
突如其來的一句，MK晴頓時語塞。
他真誠的這句說話，融合於空氣中，一直迴盪。
看著康仔純真的臉，她笑了，激動的笑了。眼眶漸漸崩潰，待在裡頭的淚水泉湧而出，她轉笑為哭。
她把一直積壓在心中的情感，無遺的爆發出來，仿佛小孩子一樣，但旁人看起來卻有種心酸的感覺。
「嗚啊啊啊......」淒厲的哭喊聲響遍四周。
康仔二話不說，把她緊緊抱入懷裡。
「唔好喊啦，有我喺度。」
康仔搞不清楚狀況，一貫堅強的她從來不會反應如此。可是看著她的淚水，康仔感覺到她對過去的傷感，還有對未來的惶恐。
今天以後，到底會發生甚麼事？他心裡也萌生起不安的念頭。
「多...多謝你...」MK晴緊擁著他硬咽。