【懸疑】《連登連環殺人事件》: —-第六章—- 3.
「一杯黑咖啡，唔該你。」
咖啡師把粉末小心的放入濾杯上的錐形濾紙，打著圓圈均勻地泡沖熱水。
啡色液汁慢慢滴漏進杯子裡，良久次後，咖啡師便把熱噴噴的咖啡端到子熹眼前。
「慢用。」
「唔該。」
拿著咖啡，子熹回到角落的位子上，芊芊亮著星眸望著他手上的咖啡。
「好香啊，可唔可以比我飲一啖？」
「緊係唔得啦，你啱啱先出院，唔好亂飲野啊。」
「但係醫先都話我無事啦。」
「乖啦，忍下口。」
芊芊嘟起嘴，表示不滿。
「好囉。但係你咖啡都買埋喇啵，仲唔快啲講。」
他湊近杯子呷了一口，舔唇問：「講啲咩？」
「尋晚你地既事啊，唔好以為我唔知你地去搵連埋住喎。」
「噢。」子熹笑著點頭：「我本身都準備講。」
「佢有無透露啲咩線索？」
「嗯嗯，關鍵既線索。」
「關鍵既線索。」芊芊重複他的話，期待著答案。
「連埋住話殺人犯就係阿田，佢公司既前員工。」
「阿田？！」芊芊落入沉思。
「係啊。」
「嗯...老實講，我有啲驚訝。」
「我本來都以為阿田唔會係兇手，但聽到連埋住話佢親眼見住阿田多次喺兇案現場出現，而且佢唔似講大話，所以應該無錯架喇。」
「不過咁喎，阿宜出事果一次，定位監測既機器明明探知到佢唔喺兇案現場架喎。」
「我有考慮過呢個問題，但或者佢喺手機上做左手腳，甚至換手機避過警方既監測亦唔出奇。」
「都係既...我地重案組當初都覺得佢係疑兇，今次既事更加可以證明到佢就係兇手。」
「由於我唔想將呢個重要消息便宜比蘋果陳，我諗緊不如將呢個消息同胡Sir講，然後一齊去捉阿田返嚟。」
芊芊皺眉：「胡Sir...佢而家咁頹廢既樣，同佢講真係有用咩？」
「或者呢次係振作起佢既好方法呢。」
幾乎於話說完後的同一時間，子熹的手機便響過來。
子熹和芊芊面面相覤。
他接通電話後，馬上便聽到胡文軒的聲音。
「子熹。」
「胡Sir。」
「幫我召集我地Team既所有人，立即返嚟總部重案組Office。」
「Office？」子熹孤疑：「唔係已經比蘋果陳攞左嚟用咩？」
「陣間再同你解釋，馬上過嚟！」
「Yes Sir！」
斷線後，一陣凜風從門扉方向傳來。
這令子熹聯想到電影「功夫足球」中，眾師兄弟們在球場上拾回他們昔日功夫和自信的一刻。
他對著芊芊感嘆：「我感覺到，真正既胡Sir返嚟喇。」
「...下？」芊芊沒看過周星馳的電影。
「出發啦總之。」他站了起來，一口飲掉黑咖啡，五官苦澀得皺起來。
芊芊也隨著站起來。
以電話訊息通知所有人後，子熹駛車帶著芊芊直奔總部。
到步時，可見影姨已經到達總部門外，泊好車後三人一起快走上辦公室。
「點解會咁急要返嚟公司既？」影姨問。
「我都唔清楚。」子熹說：「會唔會係一哥比多次機會我地？」
「但願係咁啦，不過蘋果陳佢地唔係佔用左我地之前office架喇咩？」
「係喎，唔通佢肯讓番重案組個位比我地Team？」
「蘋果陳邊可能肯喎！」
「我地一直估落去都無意思，上到去再睇下咩情況啦。」
「唯有係咁。」
上到三樓，一個穿綠色西裝的男人注守門前，是蘋果陳的手下。
他看到三人後，居然招招手，歡迎他們過去。
「好可疑...」子熹說。
影姨怯懦：「胡Sir會唔會係比佢地捉左啊？」
「機會好大。」
「好卑鄙...」
子熹帶頭，慢慢的走過去。芊芊打量著西裝男的表情，見他面帶微笑，實在猜不透他的想法。
繞過西裝男，踏入辦公室門口一刹，子熹看見了驚天一幕。
胡文軒和蘋果陳，竟然共坐在沙發上，專心地討論著。從他們的表情上看，並不像是在爭辯對罵，反而是在合作交流。
水和油居然能溝在一起，這樣令子熹大為不解。
不單是他，影姨和芊芊也看得啞口無言。
「咦，到嗱你地？」胡文軒發現他們。
胡文軒打扮得十分整理醒神，早幾日頹唐的模樣已消失無蹤。
「胡Sir…點解會咁架？你撞親個腦？」影姨上前，不斷摸他的臉龐。
「無啊，無啦啦點會撞親個腦吖。」
「咁你做咩變得咁靚仔，而且仲同蘋果陳咁好傾既。」
「唉啊，你唔好摸住先。」胡文軒捉住她的手放下來：「我靚仔就不嬲既事架啦，至於點解同阿陳咁好傾，咪就係因為要查出真相咁簡單囉。」
胡文軒居然改口喊蘋果陳做阿陳，子熹更驚訝了。
「唔信！定係你都撞親個腦呢？」影姨望向蘋果陳。
「你就撞親個腦。」蘋果陳咬一口蘋果，乾脆的說。
「唔好講廢話喇，我地一齊傾傾正經野先。阿陳尋晚打比我，話佢有兩個重要既發現。」
兩個重要的發現，芊芊不禁嚥口水。
「所謂發現，係咪就係知道兇手係邊個喇？」子熹問。
「嗯嗯，兇手就係......」
「係阿田？」
「你點知道架？」這次換胡文軒驚訝。
「我地盤問過連埋住。」子熹說：「用特別既盤問方式。」
「噢，做得好。」胡文軒點頭：「咁就更加確信我地既推測係無錯。」
「你地查到乜野？」
「嘻嘻。」蘋果陳插嘴道：「我地知道兇徒喺暗網購入軍用物品，然後喺謀殺時使用。經過調查，我地得知香港上環既一間古玩收藏店購入武器，而再到店鋪外監視後，見到嫌疑人之一既阿田就係店鋪負責人，所以好肯定佢同案件有關係。」
子熹馬上聯想到早前跟阿田接觸時，她跟他說辭職開店鋪的事。他還想起Carmen跟他說，吳福銘查出暗網軍用冰錐活躍交易的情況。
他垂頭咬咬牙。
胡文軒說：「而家我地已經派左人全天候監視住佢，但為免打草驚蛇，我地唔想捉佢返嚟住。等佢聽日落手之前，我地馬上捉住佢，然後再喺佢身上搵出武器，人贓並獲。」
「都係既，但咁樣既話我地最好同下一個受害目標聯絡先喎。」
胡文軒嘆了一聲，表情變得複雜。
「呢個就係我想講既第二個重要發現。」
他掏出手機擺放在桌面上，讓三人清楚閱讀屏上內容。
「佢將會係阿田既下一個目標。」
——————————————-
#9 光之美少女
我最重視既人兩個星期前離開左我身邊。
以前細個，每次遇上任何難題，或者有人欺負我，佢都會為我出頭。對我嚟講，佢就好似陽光咁，源源不絕地給予我能量。
而家只係剩返我一個，感覺失去左人生既依靠，亦都曾經有尋死既念頭。
但係我諗通左喇，死並唔係一個辦法，反而努力前進先至係正確態度。希望呢度既所有人，都可以重拾翻生存既理由，唔好貿然尋死。樓主亦唔好有呢個殺人之心，應該要尊重生命！
共勉之！
——————————————-
子熹讀完之後，突然滿懷感受的說：「佢講得好好，生命係應該要被尊重......」
接二連三的兇殺事件，早已令他精神萎靡，他一直很渴望結束這個無意義的死亡事件，可是現階段仿佛是個受盡束縛的木偶，無計可施。
芊芊見子熹情緒有點波動，自己的心情也落入谷底。
胡文軒見他們失落的模樣，唇齒顫巍巍的，說話在嘴邊醞釀，不知如何組織出來。
「唔知點樣開口講好？」在旁的蘋果陳問他。
「少少。」胡文軒答。
三人見他有話要說，隨即把注意力集中在他身上。
子熹問：「胡Sir，你想開口講啲咩？」他想了想，再問：「關於你地既發現？」
「其實，我同蘋果陳點解會和好，就係因為下一個受害目標既身份。」
「佢既身份有咩特別？」
「佢係一個...我地都熟悉既人。」
「明星？有權有勢既人？」影姨追問。
胡文軒搖頭，把話說得更白：「佢係我地既朋友......甚至應該咁講，佢係我地不可或缺既手足。」
三人聽到消息以後，臉色變得鐵青。
他們呼吸聲變得急促起來，懷著焦慮不安的心情等待胡文軒說下去。
「即係，邊個？」子熹想要確認的問道。
胡文軒嚥了一口唾液，緩緩的說。
「係MK晴。」