【懸疑】《連登連環殺人事件》: —-第五章—- 3.

「我已經比你地搞到坐左幾日監，仲差啲比人當成殺人犯，你地肯放左我阿爸未啊？！」
 
羅明亮對著電話咆哮。
 
「辛苦你喇，你做得好好。」電話另一端是一把女聲。
 
「咁我阿爸呢？我要確定佢既安全！」
 
「好，你稍等。」
 




然後是一陣車輛行駛和撕膠紙的聲音，羅明亮在大街上不耐煩的前後踱步。過了半嗝，終於有人繼續說話。
 
「阿亮？」
 
「爸爸？」
 
「係呀。」他的聲音疲憊。
 
「你無事嘛？佢地有冇傷害你啊？」
 




「無事喇，一切都過左去......」
 
羅明亮握著電話的手顫抖，眼淚輕流，怔怔的笑了起來。





「你醒嗱？」
 




芊芊迷迷糊糊的撐開眼，只見頭上雪白的天花板，旁邊像花一樣的風扇規律地轉動著。
 
「我喺邊？」
 
「你喺醫院。」是子熹的聲音。
 
她稍微坐起來，才發現自己身在醫院的獨立病房，後腦感覺到軟軟的東西，是包紮所用的繃帶。
 
昔日重案組的所有人也在，除了MK晴，他們看到芊芊平安無事也鬆一口氣。
 
「你知唔知我地幾擔心你啊？」影姨捉住她的手。
 
「對唔住。」芊芊細語道。
 
「下次你地唔凖再私自調查啊。」影姨回頭，以命令的口氣跟康仔子熹說：「我地話哂都係一Team人嚟架嘛。」




 
「知道。」兩人點頭。
 
「但果一刻到底發生咩事？我忽然間暈一暈，之後就失去意息。」芊芊還沒有搞清楚當時狀況。
 
「你比人襲擊。」子熹道。
 
康仔憶想當時情況說：「煙霧消散之後，基本上係一片混亂，唔少人即刻衝出門口。喺人群疏離後，我見到你同四眼男都瞓左喺地下，我即刻過嚟睇下你，發現你暈左，而四眼男就被殺害。」
 
「醫生話你比人用硬物擊頭，導致腦部出血，同你做左個小手腦，應該好快會無事。」影姨說。
 
「咁個人偶兇手呢？」芊芊突然記起，頓時心急如焚：「子熹你追唔追到佢？」
 
子熹搖搖頭：「當時煙霧太大，搵唔到出口既路。」
 




「噢...」
 
「但係蘋果陳既手下喺佢衝出去後，成功捉到佢。」
 
「吓！」芊芊展現希望的笑容：「咁就一天都光哂喇。」
 
可是子熹還是淡然的搖搖頭。
 
「果個人經調查後，發現佢係患有輕度弱智，懷疑係被人利用。詳情我地都唔太清楚，畢竟而家負責調查既係蘋果陳佢地。」
 
胡文軒坐在一旁，從送給芊芊的水果盤裡掏出一個橙，沒精打彩的開腔：「呢個兇手咁神通廣大，我諗我地都無咩野做到啦。」
 
「你作為我地阿頭，邊可以咁易放棄架。」影姨深鎖眉毛。
 
「已經係過去式喇。」他剝開橙皮，邊吃邊走出病房：「既然芊芊無事，咁我返去瞓先喇。」




 
子熹目送著胡文軒遠去，胡文軒好像變了個人似的，昔日的光彩不再。
 
砰，門關了。
 
「胡Sir點解會變成咁架。」康仔嘆息。
 
「唔好提喇。」影姨生氣：「講起佢就嬲。」
 
「講番件案先，覺唔覺得今次事件有啲疑點？」子熹說：「今次快餐店消防系統比人關閉左，通風口其後發現菸塞，所以啲煙一直都消散不去。」
 
「兇手會唔會係快餐店店員之一？」影姨問。
 
「唔肯定，但我調查過佢地背景，佢地同之前既案件並無關連。我諗有可能因為快餐店警戒意息唔高，令有人走入去關左系統都唔知。」
 




「有冇得睇翻閉路電視？」
 
「睇過，但店員只係比事發一日既情況我睇，因為我地而家並無警權。」
 
「唉，咁到底係邊個做架。」
 
芊芊摸摸後腦勺，眼珠往上移，濛濛渺渺裡憶覓起當刻的情況。
 
皚皚煙霧中，聳立眼前的兩團身形。
 
「我諗我果一刻睇到啲野。」芊芊吐出話。
 
眾人瞬時望著她。
 
「你見到啲咩？」子熹問。
 
「兩個身影，一男一女。」
 
「你確定喺果個環境都睇到？」
 
子熹歪歪頭，繚繞煙霧中，要看到身影可不容易。
 
芊芊被他這樣一說，雙手交叉托在胸前思索。自己那時候會否只是看到錯覺？
 
「如果當時芊芊真係無睇錯，咁即係話疑兇暫時係一男一女。」子熹從袋子內掏出礦泉水，淺呷一口：「今次案件，女疑兇只可能係女員工喎，因為班連登仔入面一個女人都冇。」
 
「但係我地查過果幾個女員工啦，佢地無乜可疑啵。」康仔說。
 
「會唔會係我地查得唔夠清楚？」
 
「唔會掛...?」
 
「亦有可能係煙霧出現後，個女疑兇先進入現場。」
 
「如果咁既話，門口既閉路電視無可能影唔到。」
 
「又或者...」芊芊張開雙唇：「個女疑兇匿喺其他人偶入面？」
 
事發時候，除了被子熹和蘋果陳他們制伏的人偶以外，旁邊還有兩人穿上人偶服裝。
 
康仔把眸光投向芊芊：「係喎，點解我地無諗過嘅？」
 
「果然犀利啊芊芊。」子熹掃撫芊芊頭髮。
 
芊芊淺笑，靦腆的垂下頭。
 
康仔回頭，只見影姨一直滑動手機，看得入神。
 
「影姨，你覺得呢？」
 
「唔...」她把手機放在芊芊的床舖上：「或者連登仔會幫到我地。」
 
幾人探頭向前，手機映現的是連登討論區的熱門台，大多的帖文也圍繞殺手於麥記行兇一事。
 
「留意下呢一個Post。」
 
—————
 
「（記者朋友你好）合理懷疑連登Admin連埋住就係殺人兇手」———1分鐘前
 
——————————————-
#1 奇靈之皇
 
首先喺度同魂初弒巴打講聲RIP，你既離開無疑係我地既損失。
 
講番今次既連登仔麥記聚會，由Party開始，我已經發現連埋住神色有異。而喺煙霧爆發之前一刻，即係幾個自稱警察既人出嚟話要搜人偶身既時候，我發現連埋住偷偷離開左快餐店！
 
Coincidence？I think not！連埋住一定係知道啲野，甚至可能係兇手！
——————————————-
 
正評 8735  負評  524
—————
 
「如果佢講既野純實，連埋住好大機會知道兇手係邊個。」子熹說。
 
「甚至可能係兇手！條友成日賊眉賊眼，講野又串，我都估到佢係兇手架喇。」康仔為案件取得突破感到興奮過來。
 
「但係咁喎，我地之前已經兩次向佢問話，佢根本唔會老老實實講真相出嚟。」
 
「子熹，你錯喇，今時唔同往日嘛。」
 
「咩意思？」
 
「之前我地都係以警察既身份問話，但而家喇喎，嘿嘿嘿......」
 
康仔擺出老謀深算的奸笑。子熹怔一怔，然後馬上明白到他的用意。
 
「你個死仔吖，知你想點啦...不過得唔得架？」
 
「得唔得呢啲野，試過先知既。」他磨拳擦掌道。
 
影姨望著兩人，納悶得很。
 
「即係點啊？」
 
「你今晚咪知。」兩人回答。