[專員≠Hugo] 我係溫文樂，奉命調查一宗垃圾站藏屍案: 一

“琴晚零晨，一名清潔人員係慈雲山慈正村垃圾站發現一具女性屍體， 
警方暫列作發現屍體案處理。” 新聞主播正報導緊晚間新聞。 

電視上既畫面一轉，影住已經被圍封既垃圾站。 
企係鏡頭前，係一個生面口既女記者。 
瓜子口面，雙眼炯炯有神。青澀得緊要，神態卻淡定得過份。 

“警方係收到報案後趕往慈正村垃圾站，並立即封鎖現場。 
據了解，一名清潔人員係處理垃圾既時候，發現屍體。” 女記者係垃圾站外報導。 





“死者年約二十至三十歲，身型偏瘦。 
由於屍體已經腐爛，警方暫時未能確定死者身份。 
案件交由東九龍總區重案組跟進。 
香港電視實習記者，呂芷晴報導。” 

“特首梁振英表示…”主播繼續報導其他新聞。 

攤係梳化上，飲住可樂，睇緊新聞既，係我，溫文樂。 
我皺皺眉，疑惑緊點解電視台會搵個實習記者去報導發現屍體既案件。 
通常呢d畫面都會好核突，冇番咁上下經驗，隨時會驚到面青。 




我熄左電視兼鬧左句，就冇再諗落去， 

點解要鬧？ 
因為，我正屬東九龍重案組，意味住我有可能接觸呢單咁難頂既案件。 
最憎就係處理呢類屍體發現既案件。 

今日係我既休息日，小弟孤家寡人，樂得清閒， 
除左運動之外，最享受既就係係屋企乜都唔洗做。 

我伸左個懶腰，收拾一下台面食淨既PIZZA， 




涼都唔沖就去左大覺訓，打算一覺訓到大天光。