嗰晚我喺香港仔隧道穿越咗: 穿越

現實世界嘅騷擾都唔會影響到我繼續揭穿陰謀嘅心，政府唔敢對我落手都係因為有大家嘅關注，如果我突然被消失，政府就1定拿屎上身，希望大家繼續支持。

因為呢1槍，我條頸就留咗疤，亦都成為我穿越過嘅鐵證。

你問我嗰刻驚唔驚死？我可以答你好驚，但之前信誓旦旦咁話豁出去，而家走就好衰仔，所以都要頂硬上。我原地將身上嘅衫褲都除哂，除淨條底褲，舉高雙手自轉1圈，證明真係無武器喺身，然後再向中環身門大嗌：「我喺嚟和平談判，身上面真係咩武器都無。唐將軍，我哋唔好再做成流血事件，令生靈塗炭喇，好唔好？」

對方無回應，而我只可以企喺度等，1分鐘、兩分鐘，都唔知過咗幾多分鐘，中環城門打開咗，衝咗兩隊過百人嘅軍隊企喺城門兩側擺咗個陣警戒，唐將軍就喺中間1個人行過嚟，咁睇法應該佢願意同我傾。

我慢慢著返衫褲，好有禮貌咁對佢做咗個拱揖，而唐將軍就用佢招牌笑走過嚟張開雙手想擁抱我。





「果然喺受英國影響好深，文化都似西人，要擁抱嘅。」我心諗，於是配合佢將雙手張開想同佢擁抱，點知我張開雙手嘅同時，呢隻老狐狸竟然捉住我對手再用關節技將我雙手反鎖背後，用1隻手就將我制伏。

「你哋嘅人質喺我手上，如果想佢無事，你哋就快啲退兵，唔係我保證唔到佢嘅安全！」唐將軍對住九龍軍大喊。

「仆街，估唔到你係咁狗嘅，今次我真係失策。」

「兵不厭詐，怪就怪你太嫩，自己送上門。」

喺呢個情況之下，我真係無計可施，打定輸數。





「等陣！」1把洪亮又帶啲滄桑嘅聲音劃破陰暗嘅戰場：「放咗佢，我同佢交換，我做人質，點計我都有利用價值過佢，對你更有利！」大嗌嘅係曾灶財，我哋嘅九龍皇帝。

「唔好過嚟，你仲要返去原來世界嘅，你走先，唔好理我，我應付得到，今次我返唔到去住，下次我就返到。」

「今次你1定要返到去，我喺呢度生活咗咁耐，咩都慣，我都當咗呢度係我屋企，我走唔到都無所謂，反正係呢度做皇帝嘆世界，返到去做隻狗，我先唔制。」佢邊行邊將身上裝備除低丟開。

「你老婆仔女嗰啲呢？你唔係要返去見佢哋咩？」

「都咁耐無見，我見到都唔認得佢哋，咩感情都淡哂，而且我喺呢面都有頭家，我過得仲開心寫意，我諗過嘅喇，我唔返去喇。」唔驚唔覺佢已經行到我面前，身上都係1絲不掛，只得返底褲。





「1換1？你當我傻？有兩個人質點解只要1個？」唐英年又再次展露奸猾嘅樣。

佢左手制伏我，右手拎住枝手槍指住曾皇帝太陽穴，九龍軍立即軍心大亂，士兵露出絕望驚恐嘅擾攘聲，而肥璋、文仔、星姐同斌哥就喺度盡力穩住軍心。

「哈哈！睇吓你哋，1個2個都咁蠢，連皇帝都係白癡，搞到軍心大亂，抵你哋九龍被滅國！」唐將軍對住九龍軍大嗌：「邊個唔想死嘅就而家放低武器跑過嚟歸順我哋，保證你唔會餓死！」

聽到呢句招降宣言，成班九龍嘅乞兒大軍2話不說拋開啲武器即刻跑過嚟，而首當其衝嘅竟然係肥璋佢哋4個！

坦白嘅，我嗰刻超失望，估唔到大家都係貪心怕死。

但係佢哋越嚟越近嘅時候，我終於望清楚所有人嘅表情，佢哋臉上唔係貪生怕死、苟且偷生嘅死樣，而係破釜沉舟、放手一搏嘅狠樣，同時，曾皇帝細聲咁講左句：「係時候喇，阿超。」之後佢用手托高唐英年揸槍隻手，等佢嘅威脅消失，然後再施展中國功夫最博大精深嘅兩招超必──撩陰、插眼，唐英年中招之後立即㩒住下體倒地碌地沙，我重獲自由之後第1件事要做嘅就係調返轉脅持返唐英年，命佢開城投降，而佢亦都乖乖照做。

西港島順利收復，而時間亦都得返1個鐘多d，即係剛剛夠趕去門嗰面，我捉咗曾皇帝埋1面，同佢講話而家要走，唔係趕唔切，而佢都話交代埋啲手尾就得，等多10分鐘。

我都趁呢10分鐘同幾個兄弟道別，之後就同曾皇帝出發去門。





我哋快馬加鞭，趕係門開前10分鐘到，做好所有心理準備，企定係門嘅位置等待門開啟。

但係世事往往出乎意料，喺門嘅位置1早已經有班人等緊，由佢哋嘅衣著睇得出，佢哋係香港軍嘅士兵，睇嚟係曾蔭權知道我哋會出現而1早派人埋伏。

兩個人對20個人，完全無勝算可言，而門只係得返10分鐘就開，要返到原來世界仲要過呢關，真係唔容易。

「如果而家有人嚟幫手就好。」諗當然咁諗，但事實係無，要智取不能力敵，但佢哋企係度圍住門嘅範圍死都唔郁，見到我哋都無追擊，睇嚟目的只係唔想畀我哋走。

天色黑齊，無燈嘅山特別黑，油燈嘅微弱光線都幫唔到太多，能見度都係好低，而我哋就同香港島嘅士兵對峙已經5分鐘，距離門開得返5分鐘，突然靈光1閃，我諗到條計，同曾皇帝耳語後，我哋靜待最後兩分鐘嘅來臨。

而我腦內不斷預演最後兩分鐘嘅行動，係短短3分鐘，我諗我預演咗有成百次。隨住我嘅預演，真正嘅行動時間到，首先我將油燈丟向港島兵前，燈爛而油瀉，火隨住油喺草地燃燒起嚟，港島兵見到火開始散開，然後除衫撲火，而我哋趁呢個時間喺地執咗啲石同樹枝做武器擲向佢哋同扑佢哋，佢哋都拎武器還擊。

有油嘅引導，火越燒越旺，燃燒嘅範圍開始擴散，好似想將我哋同港島兵吞噬咁，而門亦喺呢個時候開咗。





「要走喇，唔好再同佢哋糾纏。」我邊對住曾皇帝喊話，邊用最後嘅力擋開港島兵，1個箭步衝到門前。

「無問題，你行先，我殿後，快啲走，轉頭見。」曾皇帝孤身力抗眾兵，但我信佢有辦法甩身，所以我就先行走入門。

走咗入門，眼前景色、事物、聲音都開始扭曲，隱約聽到曾皇帝同我講咗1句說話，但係因為聲音扭曲嘅關係，我聽唔到佢講咩，只係得扭曲咗嘅聲音「雷妖呵呵聲麼」，坦白講，我到而家隔咗咁多年都仲未知佢講啲乜，如果大家估到可以留言或者私訊話我知。

喺門入面嘅世界，我見到好多唔同嘅人生片段，有啲係屬於原本世界嘅我，又有啲係屬於另1世界嘅我，其中有1段我見到有好熟悉嘅感覺，係童年嘅我喺間房入面，我著緊原來世界嘅衫，但間房係另1世界嘅布置，點解會咁？呢段記憶我無乜印象，睇返個年紀我嗰時係住葵涌，但間房同我住竹園時基本上1模1樣，而我記得嗰時我係有失蹤過，屋企人仲報埋警……而另1個片段我見到都有啲餘悸，就係我喺原來世界屋企樓下，嗰時住大窩口，比之前片段已經大咗啲，但身著嘅竟然係另1世界嘅乞兒裝，而我記得阿媽話我係有失蹤過兩次，第2次係街坊揾返我。睇呢兩個片段，唔通我以前已經試過穿越？

喺門入面其實幾難受，各種扭曲令我有啲嘔心，啲片段好似人生走馬燈咁不斷出現，突然我見到塊全身鏡，鏡入面嘅我著住我平時嘅衫，對住我笑，講咗句再見，之後我就無咗意識，而家諗返，嗰時見嗰個應該係另1世界嘅我。