嗰晚我喺香港仔隧道穿越咗: 倒數
呢件事去到而家，我受到嘅壓力同騷擾之多係好難有人想像到，政府試過用唔同方法去令我覺得成件事係假、係我幻想，但只要我睇到頸上嘅疤痕，我就知件事係千真萬確。
「班港島俘虜而家點？」我問文仔。
「本身佢哋唔信我哋真係對佢哋咁好，但見到連守衛都走埋之後就開始軟化，而家大吃大喝緊，好開心咁。」文仔描述返個情況我知。
「好，咁你叫啲人準備好沖涼水同拎啲乾淨衫畀佢哋換，時間無多喇。」
「好，不過點解時間無多？」
「因為聽晚8點前搞唔掂我哋就會被滅國。」我講得特別冷酷，唔係要耍帥，而係想畀佢知道件事係幾咁緊急。
而呢招似乎奏效，文仔雞咁腳走咗去安排，而我就去睇下曾皇帝情況點，再決定之後嘅行動係我1個人做定兩個人做。
「你郁唔郁到？」我問曾皇帝。
「點會郁唔到？我都無事，只係攰得滯啫。」好明顯睇得出佢係死撐，既然係咁，之後嘅事只可以靠我1個去做。
「好，咁你好好抖吓，前期準備功夫搞掂哂之後我就叫埋你去埋尾喇。」
「好，唔該，咁我瞓多陣先。」
我輕輕力關門，開始做前期準備。首先去兵營揾咗班將領開作戰會議，將聽日嘅作戰計劃講畀佢哋知，等佢哋幫手講畀班士兵知。
然後就去兵器庫同船塢確認要用嚟彰顯我哋軍力嘅道具情況係點。
到最後，亦係最關鍵嘅1環，就係去勸降班俘虜歸順我哋九龍，成唔成功絕對影響個作戰計劃。
7月14號朝早，我同文仔1齊去到安排班戰俘入住嘅房，喺門口已經聽到佢哋七嘴八舌嘅對話，當中有人講點偷走、有人猜度我哋用意、有人表示想留喺度、有人想同外面聯絡裡應外合……不過當中關鍵人物李少光就完全無出過聲，我細聲咁同文仔講咗幾句之後，佢就走咗，而我故意喺門前清1清喉嚨，然後敲門等佢哋開門畀我入去。
「吱……」隨住刺耳嘅門鉸聲，影入我眼瞼嘅係1班目露兇光嘅港島人同坐係度臨危不亂、有大將之風嘅李少光。佢露出1個大方嘅微笑請我坐低，然後就講：「英雄出少年，嗰晚就係你率兵打敗我哋？而家睇清楚先發覺你仲係小朋友嚟，但用兵同謀略都有好高造詣，佩服。」
「失禮，在下係九龍軍1個小人物麥啓超，用兵同謀略都喺打三國志同aoc打得多學返嚟啫，不過以李將軍嘅行軍經驗，應該都估到我今次造訪嘅目的。」
「你係咪指禮待我哋呢班戰俘，想我哋投降呢件事？」
「哈哈！李將軍果然係聰明人，無錯，為咗唔想再有無辜嘅人命傷亡，加上我哋本是同根生，所以投降我哋九龍軍，盡快將戰事結束，令老百姓傷害減到最低先係最正確嘅選擇。」
「小兄弟，我好明白你個算盤係點打，亦都好感激你對我哋招呼咁周到，我年紀唔細，都想安穩過日子，但呢班同伴嘅諗法我就控制唔到，但作為佢哋嘅將軍，我一定會陪佢哋佢戰到底，所以即使當中有1個人唔願意，我都唔會接受勸降。」呢番話講完之後，其他士兵立即起身將我重重圍住。
「李將軍，」我特登扮到好冷靜，耷低頭露出1個自信嘅笑容，然後繼續講：「我1直好欣賞你呢個為國為民為主為部下嘅性格，如果你真係覺得咁做係會對成件事有幫助嘅，咁你就叫佢哋郁手喇，不過我好清楚你知做點嘅選擇先係最好。」我嗰時咁講都係搏1搏，好彩搏贏咗。
「好，小兄弟，你有種，你畀啲時間我，我哋要傾傾先。」
「好，不過唔好太耐，因為我哋嘅軍隊已經去緊西港島。」
「果然英雄出少年，小兄弟，係我哋傾之前再問你1樣嘢，點解你咁確定你哋九龍係最好？」
「哈，咩叫最好？我唔清楚，我只係知道只要所有人有1個共同信念，而且大家都肯去為呢個信念奮鬥，咁就係最好，我哋九龍嘅信念好簡單，就係要港人治港，唔畀其他外國同中國勢力統治！」
「真係可以咩？」
「如果連信都唔敢信，點可能有？我哋九龍每個人都信，都為呢個信念奮鬥緊！」
李將軍聽完之後會心微笑，我離開咗間房等佢哋自己傾，喺佢哋傾緊期間，我都準備好哂啲裝備同馬，預備趕去西港島指揮作戰。
「吱……」刺耳嘅門鉸聲又出現，證明咗佢哋已經傾完有共識。
「小兄弟，我哋決定咗加入你呢個信念，同你1齊去勸服西港島嘅同袍。」
「咁就好，快啲上馬趕過去，我已經準備好哂。」
於是乎1行幾十人浩浩蕩蕩咁出發，1切都似乎好順利，直到去到大本營門口，有1個熟悉嘅身影係度，原來係本應臥床嘅曾皇帝！
「作死你呀？出發打仗咁大件事都唔叫埋我去？作為1國之君，呢啲時候我點可以喺床瞓得著？」
「呢次作戰有我就搞掂，你休息多啲，為下場作準備仲好喇。」
「無得傾，只要我1日未死，我都會親自上場指揮。」
睇嚟係拗唔過佢，所以只好畀佢1齊去出戰，反正唔駛打，應該好輕鬆，對佢嚟講當呼吸吓新鮮空氣都係好事。
我哋快馬加鞭，兩個鐘多啲就已經去到戰場前線，即係堅尼地城，本身陷入膠著嘅戰事，因為見到曾皇帝嘅出現而開始取得優勢，最後仲1舉攻陷堅尼地城，港島軍退守香港大學，而呢個時候就係用和平宣傳嘅好時機。
由於之前我已經交帶過所有將軍唔殺降兵同唔屠城，取而代之嘅係以禮相待，所以當啲降兵見到李將軍1行人嘅時候，都好輕易被說服投靠我軍，而平民百姓亦都好樂意歡迎我哋，所以後患斷除，而最後要做嘅就係將香港大學到中環嘅整個西港島和平接收。
按照計劃，海陸兩路我哋都用大軍壓境，然後派出李將軍1行人勸說對方大將開城投降，諗唔到效果奇佳，好快就將香港大學、西環、上環同半山都和平接管，無流過1滴血。
至於中環就難搞啲，因為都受到尖沙咀海戰影響，對我哋九龍軍抱有懷疑，唔肯輕信我哋，而辦法只有兩個，1係強攻，但會破壞咗之前畀西港島其他城嘅印象；1係等，等佢哋知我軍係無心開戰，但時間上唔容許。
呢個情況僵持咗就快4個鐘，已經去到晏晝5點，倒數3個鐘門就開，要快啲搞掂先得。
「點呀，有咩諗唔掂？」1把好耐無聽過嘅聲音喺後方遠處傳嚟。
「而家喺死胡同入面，時間所剩無幾，你話點好，肥璋？」
「有無諗過唔靠其他人，只靠自己去做？」
「即係點呀，星姐？」
「即係叫你自己1個去同對方大將傾。」
「行得通咩，斌哥？」
「唔試吓點知？馬死落地行。」
「你講得啱，文仔，1於咁話，多謝你哋幾個，好兄弟。」
「乜說話，你叫文仔揾得我哋咁急，我哋當然即刻嚟喇，打仗嗰面用你啲計仔交畀副將已經應付到，反而呢面先係主戰場，搞掂呢面嘅話，我哋其他戰場都易打好多。」肥璋拍住我膊頭講。
「好，既然呢面有你哋坐陣，時間亦無多，咁我就豁出去搏1次。」
時間得返3個鐘，計埋要去到門嘅位置，即係得返1個鐘鬆啲，所以1秒鐘都唔可以浪費，我交代完我嘅計劃之後，就1個人走咗去中環城門前大叫：「唐英年將軍，我有嘢要同你傾！」
「咻！」我左面頸被子彈擦過，出現咗1條血痕。
「我哋應該無咩好講，你再行前1步，下1粒子彈就會喺你腦入面！」