嗰晚我喺香港仔隧道穿越咗: 逃脫

終於成件事講到差唔多完，感激咁多位會睇到呢度,我知好多人唔信陰謀論，覺得我講嘅嘢係老作，但I don't fucking care。信嘅我多謝你，希望你可以將呢個訊息幫手傳開；唔信嘅都無所謂，希望你可以小心啲香港仔隧道，因為入面太多秘密。

喺曾皇帝準備工具期間，我1直安分守己咁做稱職嘅監躉，冷嘲熱諷、言語侮辱、肉體傷害、精神虐待無1缺少，雖然難頂，偶然曾港督同劉主席會過嚟施虐一番，但我同曾皇帝都一一忍受，始終比起呢啲傷害，可以返到我哋原來嘅世界比任何嘢嚟得重要！

呢啲牢獄生活大概維持咗4日，呢段時間我成日見到曾皇帝夜晚唔瞓匿喺牆角唔知搞啲乜，時不時又聽到外面傳嚟啲槍炮聲、叫陣聲，唔知發生乜事，但其中1件可以確定嘅事就係啲獄卒越嚟越少，對我哋嘅虐待亦都慢慢減少。

喺12號晚，正確嚟講係13號凌晨，曾皇帝拍醒我，手上拎住1把造工粗糙嘅木製匕首同埋護腕，我啱啱瞓醒都未意識到發生咩事，曾皇帝就開口講：「快啲拎住同戴住佢，我哋要走喇。」

我接過呢啲武器，發現匕首喺用平時食飯嘅餐具加工整合而成，而護腕就係用瞓覺嘅蓆再加埋餐具改造而成，呢啲就好似online game嘅新手裝咁，雖然造工一般，但基本攻擊同防禦都勉強應付到，而我喺接過嘅同時，留意到曾皇帝身上嘅裝備──1把鐵製短劍同1雙鐵製護腕，好明顯比我好得多，不過都無辦法，有裝備已經好。





曾皇帝喺腰間拎出1條木製鎖匙，三兩吓手勢就開咗監倉閘門，靜靜雞走出去望吓4周，發覺無人就向我招手示意我跟住佢行，每逢轉角位都會小心翼翼咁偷睇有無獄卒喺度，但奇怪嘅係，我哋1路走到監獄門口都見唔到其他人，彷彿成個監獄就係得我哋兩個。

既然1路都無人，我提議曾皇帝去獄卒房拎啲好啲嘅裝備，美其名係提高對抗性，但實際上係我對身上木製嘅裝備太無信心，好彩曾皇帝最後都同意我嘅提議。

雖然沿路都唔見人影，但小心駛得萬年船，我哋依然喺每個轉角位都打醒十二分精神，以防有埋伏，甚至喺獄卒房前仲夾好簡單作戰計劃先開門衝入去，但最後都用唔著。

我哋換上全套防暴武裝，我個心頓時踏實好多，走返去監獄門口，曾皇帝用獄卒房拎嘅門口鎖匙將門打開，眼前景象令我吃驚──滿地屍塊，無1條屍係完整，全部身首異處，斷手甩腳。

我忍唔住嘔，同睇戲嗰啲第1次見到屍體嘅人反應1樣。





「趴低！」同時我畀曾皇帝用力壓咗喺地。

「嘭！」離我大約兩米嘅地方傳嚟炮彈爆炸嘅巨響，炸到我耳仔短暫失聰。

「快啲跟住我走！」根據口型，我估曾皇帝係同我講呢句，於是我跟住佢喺地上匍匐前進，直到躲進附近樹林。

「究竟發生咩事？」我好想問出口，不過我估曾皇帝都答我唔到，所以最後都無問，轉為靠我自己雙眼觀察。

地上死嘅人我見大多數都係著乞兒裝，換言之即係九龍軍，睇怕新界香港聯軍已經前後夾擊緊九龍，皇帝失蹤加上盟軍叛變，腹背受敵，士氣低落，軍情告急，而家首要做嘅嘢係曾皇帝現身大本營指揮作戰，以振軍心，但大本營係邊？





我望住地上嘅屍體，見到有1個奄奄一息，尚有1絲氣息，於是我同曾皇帝爬去佢身邊，想拖佢入樹林，可惜佢被大石壓住，完全拉唔到出嚟，只好喺佢仲清醒時問佢事情嘅始末，以及大本營所在。

「可惡嘅曾蔭權同劉皇發，只係4日就將我哋九龍變做地獄，我哋要反擊，唔可以畀佢哋亂嚟！」曾皇帝義憤填膺，就好似1隻徹底被人激嬲嘅沉睡獅子咁要大開殺戒！