嗰晚我喺香港仔隧道穿越咗: 揭破
好喇，又避世咗一排再浮面，始終要避嫌，世界太危險，政府太陰險，繼續講埋件事嘅發展先。
去到關押曾蔭權港督嘅牢房，而拷問工具亦都準備妥當，拷問大會正式開始。
曾港督見到我哋嘅工具，估計都知嚟緊會發生咩事，成個人嚇到臉都青埋，一直郁身郁勢咁掙扎，可惜佢一早已經被獄卒綁住係張櫈度，點都無得避。
「哈，你都有今日喇，我都唔鍾意用刑，只要你乖乖哋講哂我想知嘅嘢畀我知，咁就可以免受皮肉之苦。」
曾港督吞咗啖口水，豆大嘅汗喺臉頰滴落地上，成個人已經驚惶失色，只識點頭。
「你哋香港島有個地方啲花草樹木有好奇怪嘅現象，你知唔知？」
「好……好似有聽過啲人報……報告過。」曾港督講嘢口窒窒，好明顯係驚嚇過度。
「對於呢個現象，你知道啲乜？」
「我乜……乜都唔知。」
呢個答案好明顯唔得曾灶財皇帝滿意，於是佢隨手拎起一條鞭，往曾港督身上瘋狂抽打，可憐曾港督雙手被綁，無辦法擋，只有硬食。大約維持咗兩分鐘，曾皇帝有啲攰，於是停咗手，而曾港督身上就多咗無數條血痕。
「唔好當我得把口，唔想死就講，對於個現象你知道啲乜？」
「我……我真係乜都唔……唔知。」曾港督瀕死咁答。
「仲咁口硬？」話畢，曾皇帝拎起一渣鹽，向曾港督身上撒，佢即刻痛到死去活來，嗰時啲叫聲我到而家都仲記得，係我有生以嚟聽過最淒厲嘅。
曾港督叫叫吓就暈咗，但曾皇帝點會放過佢？佢拎起一桶凍水照頭淋，曾港督又再次醒返。
「我問多你一次，個現象你知道啲乜秘密？係咪你同英國搞嘅？」
「我真係乜都唔知……同我無關嘅，我無同英國搞啲咩秘密，我……我只係派過啲人去睇過就算。」聽得出曾港督每句說話都係燃燒生命咁講出嚟，命不久矣咁。
「咁你派人睇完之後有咩結果？有無發現啲乜？」
「佢哋報告話……話啲花草樹……樹木有好唔自然嘅切……切割面，唔……唔似人……人為，都唔……唔似係動物做。」曾港督個身開始控制唔住咁震，應該係因為啱啱啲凍水冷親外加失血所致。
「咁根據你嘅調查，係乜原因造成？」
「唔知，我無派……派人調查過，只……只係由……由得佢喺度。」
「無調查過？觀察、研究都無？」
「無……」曾港督有氣無力咁答。
「咁有無人同你報告過嗰度發現過啲乜異常嘢？」
「無……不……不過附近居民時……時不時都話啲車集體死……死火，交通混亂，每次都等大……大約15分鐘先開得到。」
「啲車集體死火」聽到呢句說話，我下意識望向曾皇帝，而佢亦都不約而同望向我，我哋四目交投、目光接觸一刻，大家都意會到終於揾到線索。
「隔幾耐會發生一次？」
「大約……約兩星期1次。」
「對上嗰次係幾時？」
「好似係……6月30……30號。」
「兩星期之後，即係應該7月14會再出現？咁通常係幾點發生？」
「夜……夜晚8點左……左右。」
「只要我哋14號8點去到，就可以返去喇！」曾皇帝對住我超興奮咁講。
「無錯，太好喇！」我都難掩我興奮嘅心情：「不過仲未問完佢啲嘢，關於佢同新界劉業強嘅事。」
「係喎。」曾皇帝收起笑容，再次目露兇光咁對曾港督怒吼：「你同劉業強有咩秘密勾當？點解今次進攻咁順利？你哋多次騷擾都唔攻上嚟，打咩主意？」
「劉業強？我同佢？哈哈！笑話！」一講到呢件事，曾港督成個人180度轉變，氣場都唔同哂：「我今日之所以成為階下囚，受你凌辱，就係等呢個機會！」
曾港督一代梟雄曹操上身咁，完全唔似啱啱被人拷問完，霸氣咁大聲講：「時機到喇，嚟喇！」
話音一落，成個監獄嘅獄卒、囚犯全部都衝哂嚟圍住我哋同曾港督，但好明顯槍口係對住我同曾皇帝，雙拳難敵4手，何況粗略估計呢度有4、50隻手，絕對無贏嘅可能，而獄卒就幫曾港督鬆綁，幫佢披返件西裝褸，招積咁命人鎖我哋入監牢，自己就大搖大擺走出去，而監獄門口已經有一個身穿長衫嘅人恭敬迎接佢，呢個人唔係劉業強，而係劉皇發主席！
我發夢都估唔到一向口講求和平嘅慈祥老人竟然先係大boss，難怪曾蔭權之前唔攻過嚟，睇怕都係唔想劉業強受傷，香港島咁易攻陷都係劉皇發呢隻老狐狸嘅置諸死地而後生嘅計仔，從來目標都係曾灶財皇帝同九龍。而家九龍嘅人都未知發生咩事，形勢好危急，文仔、肥璋同星姐都好危險，斌哥都好難幸免於難，要趁劉皇發同曾蔭權未有所行動之前通知佢哋，但事態發展到咁，睇怕佢哋都已經受緊監視。而獄卒叛變可以想像到九龍軍中已經有1部分人被收買，唔知仲有邊個係可信，睇嚟只可以靠我哋兩個。
距離下次門開嘅時間只係得返5日，時間無多；出面班人又群龍無首，加上劉皇發盟軍身份，要蠱惑佢哋易如反掌。
「如果無一個夠清醒嘅人睇得穿成件事，我哋應該唔駛旨意離開到。」
「與其被動等人救，不如主動殺出去。」
「我哋咩都無，點殺到出去？」
「哈，為咗避免呢啲事件發生，我一直隨身都帶齊架生，不過我只有信心1個人安全離開，要我哋兩個都安全走到，要留多幾日，收集多d 情報同工具。」
「工具？點會有。」
「工具點會無，睇你識唔識善用同改造。」曾皇帝胸有成竹咁微笑，呢個笑容係我見過無數笑容入面最印象深刻。