【Merry Xmas】我一個唔留神 撞死左聖誕老人！？: 第二章

第二章
 
「早晨啊，Santa！」少女對著我笑說。
 
依家的佢正坐在我的被單上面，使我不得不把她從腳到頭掃視一次。
 
少女她正身穿著杏色靴黑短褲白T-shirt，膊上繫著一件賦有聖誕節風味的紅色披肩；雖然無同佢有肌膚接觸，但就咁睇都睇得出佢皮膚好白滑；再望上啲，一副純品美麗的臉孔配上一襲及肩的杏色菇菇短髮，完美盡顯出佢天真無邪的個性（我估姐）。
 
說到最尾亦是惟一令我完全抽不開視線的，就是她的雙眼。
 




那雙碧藍清澈，彷如藏著整個海洋的眼睛。
 
然而無論點都好，一句講到尾------
 
依家究竟係發生緊啲咩事呀！！！
 
「嗚啊！」我就好似俾人污辱完咁即刻將被單拉到上下巴。
 
俾我突然咁拉一拉，少女成個人失去重心坐左落去床尾的位置。
 




「哎喲哈哈！」少女傻傻的笑道。
 
「笑笑笑，笑你呀媽瀨屎呀笑！」我心情仍未平復下來。「邊有人會著住鞋坐係人地張床上面架！」
 
啊唔係，好似錯左Focus。
 
「你係邊位呀小姐，點解無啦啦會出現係我張床上面！？」
 
「你問點解啊……」少女想了一想。「因為呢個係我既責任囉！」
 




「下！？」我完全聽唔明白少女講既野。
 
「簡單啲講------」少女望著我說。「我既責任就係輔助聖誕老人執行佢既職務！」
 
「我個名叫做莉芙。」少女莞爾一笑。「以後多多指教喇，Santa <3！」
 
我聽完少女所講既說話之後，才回憶起昨晚聖誕老人的事。
 
於是乎徐徐我舉起右手手腕，才發現那藍色的印記真的仍然存在，而且認真一看，還會發現那些碧藍色正彷如星空一般會時光時暗地閃爍著。
 
我驚嚇道 : 「即……即係琴晚發生的事係真既！？」
 
「嗯嗯。」少女點點頭。「伯伯佢依家一定過得好開心，所以你都唔洗覺得內疚！」
 
雖然對於伯伯的離去我唔多唔少都感到有啲惋惜（應該有），不過以上所有野對於依家既我黎講都已經唔重要，事關我既人生已經徹底「玩撚猿」。




 
點解？
 
因為我岩岩留意到窗外的陽光經已透過百葉簾的隙縫照射到室內的每一個地方。
 
於是乎我攞個鬧鐘落黎一睇 : 早上9點37分，25 DEC。
 
咁即係咩意思？
 
咁即係話……
 
「我屌！！！」我流住馬尿大喊。「我架單車同埋我盒乾炒牛河配凍檸茶呀！！！」
 
呀唔係講錯左，再黎過。
 




「嗚呀我屌！！！」我流晒眼淚大叫。「我錯過左搵阿詩傾計的最佳機會呀！！！Miss左呢次第時要再搵佢就好Odd架喇，無喇無喇！！！」
 
        阿詩，全名王艾詩，係我的同級同學。
 
不過講就係咁講姐，但其實阿詩係我心目中，又點只係「同學」咁簡單呀。
 
一紮天然黑色的馬尾，高貴的氣息，冷艷的雙眼，再搭配上一副清秀脫俗的臉容，簡直係無懈可擊。
 
無錯，阿詩佢就係我的心儀對象！
 
天外之音：屌，咁咋嘩，仲以為會有啲咩特別關係添，呢啲我地觀眾一早估到啦！
 
我：你出少句聲當幫忙啦！
 
你地可能會諗，明明我呢個不折不扣的死毒撚一直以黎都唔夠膽搵阿詩傾計，點解琴晚又會突然間咁有勇氣架呢？




 
如果要歸因的話，就係因為琴晚的一個美麗邂逅。
 
    下？唔明？想我繼續講？
 
        我偏唔講住呀，吹咩。
 
呵呵。
 
「唔得！」我喃喃自語道。「咁難得先有機會可以同阿詩進一步拉近距離，試問我又點可以咁快就放棄！！！」
 
於是乎我隨即攞起部電話輸入阿詩的號碼，諗住直接打俾佢。
 
然而當我輸入好佢的電話號碼之後，我又開始淆底了。
 




「無啦啦打過去，人地實以為我係變態佬啦……」我沮喪道。「而且過左咁耐先同佢講聖誕快樂，又有啲咩意思呢……」
 
唉。
 
唔知道莉芙係咪睇到我個樣灰過舊磚既關係，佢稍為坐前左少少望住我笑說道 : 「開心啲啦Santa！萬大事有莉芙係大廳！」
 
雖然有個靚女安慰自己係唔錯既，不過唔講就猶是可，一講就把鬼火！
 
話就話阿伯係臨走之前交付左「聖誕老人」呢個身份俾我姐，之但係成件事係咪都應該徵詢下我既意見先呢？搞到依家我一頭霧水，齋係諗下要點面對呢件事都已經覺得好頭痕。
 
一句講晒，呢啲咁麻煩既野真係咪搞我。
 
於是乎我坐直了身子，與莉芙對望著說 : 「多謝你一番好意先，但其實我依家真係完全冇繼承『聖誕老人』呢個身份既打算。」
 
「所以你都係唔好叫我做Santa喇，叫番我個名『姬仔』啦。」
 
「仲有，你最好都係快快手搵過第二個繼承人吧啦。」
 
莉芙聽罷沒有正面回答我，只有笑說道 :「但係做聖誕老人其實好好玩架喎！」
 
「只要你肯學的話，你就可以用魔法好似變魔術咁憑空變啲野出黎啦，又或者可以好似啲故事書寫咁係天空到飛啦------」莉芙突然帶點挑逗說 （利申鳩噏） : 「而且，你仲可以有我呢個助手陪你做野添 <3！」
 
雖然聽到最後個句說話之後我真係心動左一下，想即場將眼前呢個美少女就地……咳咳，想即場應承佢做聖誕老人。
 
好好彩既就係，我總算有足夠定力及時用番個上半身諗野，無俾美色引誘落搭而違背左我一向做人「事不關己」的原則。
 
「我唔理啦，總之我就唔想做！」我堅決的道。
 
莉芙聽到我這句說話的時候沒有太大驚訝，只是徐徐收起了笑聲低下頭來，眼神裡透出一點點的失望。
 
「真係唔好意思啊。」莉芙佢低著頭說。「無緣無故突然要一個平凡人被肩負起一個不知名既身份，又真係講唔通既。」
 
「之不過因為只有每年的平安夜晚去聖誕節的個個00時00分可以進行繼承程序，咁所以換言之下一次繼承的機會都已經講緊係一年後……」
 
「唔……唔係掛……」我驚愕的說。「咁即係話無論點都好，我最少都要做一年聖誕老人先？！」
 
「除此之外其實仲有第二個方法既。」莉芙重新抬起頭來望著我說 : 「有一套動作，只要你跟住我做的話就可以解除你腕上的印記，咁樣你就可以回復自由身。」
 
「咁解除左之後邊個做聖誕老人？」我聽罷反問道。
 
「聖誕老人？」莉芙苦笑了一下。「到時候聖誕老人就只會係一個家傳戶曉的故事，世界上再無真正的聖誕老人架喇。」
 
咁……咁即係話如果我擅自解除左印記既話，聖誕老人呢個身份就會從此係世界上面消失？！
 
「點算好呢……」我沉浸了在思緒之中。
 
老實講，比著係平時或者以前的我，呢啲咁事不關己的野我真係唔會考慮咁多，呀唔係，應該係話完全唔洗考慮，只要有方法唔洗揹責任上身，我一定會去做。
 
之但係好好笑既就係。
 
唔知點解係呢一刻，我竟然係到猶豫緊。
 
我的腦海裡面突然浮現起阿伯琴晚同我講的其中一句說話。
 
「然後，終於俾我係臨死前搵到你！」阿伯微笑左一下。「太好喇，全世界既小朋友從今以後都可以繼續有聖誕老人帶歡笑俾佢地喇！」
 
如果因為我的自私，令到世界上的小朋友係聖誕節個陣再無禮物收既話，我又過唔過意得去？
 
而且唔知點解……
 
我硬係唔想眼前呢個女仔唔開心。
 
於是乎就在房間裡面的空氣寂靜了好一會兒之後，我深吸了一口氣說。
 
「咁啦。」從未試過做呢種角色的我，居然不自覺地結巴起來。「我……」
 
於是乎我清一清喉嚨說道 : 「我想講既就係------」
 
「我決左要做聖誕老人啦。」
 
「嗯，我明白既……」莉芙微微低下了頭。
 
然而當佢真正理解清楚我講咩之後，隨即驚訝得瞪大雙眼望住我大叫道 : 「咩……咩話？！」
 
「我話我要做聖誕老人呀。」要將咁害羞的說話重新講多次真係尷尬死我。
 
「你講真架？！」莉芙完全是一臉難以置信。
 
「係呀。」我說罷立即補充道 : 「不過！我只係因為唔想以後呢個世界再無聖誕老人，所以先暫且決定做住一年『聖誕老人代理』架咋！」
 
我繼續講 : 「換言之係呢一年時間裡面我會負責晒肥老伯原先要做既所有野 （雖然我都唔知係咩），但同時我都會去尋找合適的繼承人，將呢個位傳俾佢！」
 
「等到一年冷卻時間過左之後，我就會功成身退，以後聖誕老人既野全部都唔關我事！」
 
雖然我上面講左一大輪野，之但係好明顯莉芙係完全無聽過入耳，只有雙眼一直發光咁望住我。
 
「喂……」我沒好氣咁望番住莉芙。「你有無用心機聽架？」
 
「噗哧~~~」莉芙忍不住笑了出來，展露出雪白的牙齒。「有呀有呀！」
 
被她這樣笑了一笑，我竟然感到了少許臉紅耳赤。
 
天外之音 : 屌，毒撚真係毒撚。
 
我 : 收皮啦。
 
誰知就係呢個時候，莉芙突然哄前身過來！！！
 
於是乎我同佢係張床上面就只剩下不夠一個身位的距離。
 
「你……你做咩啊！！！」我大驚道。
 
咁近聞落去，我才發現到莉芙的身上原來散發著陣陣的茉莉花香。
 
「好多謝你呀。」莉芙微仰著頭與我雙目而視，而且抿了一下嘴唇。「從今以後多多指教喇，Santa。」
 
        嗚呀！你哄到咁埋不特只，仲要用把咁溫柔的聲線講埋晒啲咁Warm的說話，犯規，犯規呀球證！！！
 
就係咁，我開始踏上了這個「聖誕老人代理」的無盡旅途。