[人生哲理]《黑白的世界不止於灰》: 16 旅行的意義(1)

16 旅行的意義
 
 
不打擾佩盈和小麗學習，我走到了醫院外面。
 
明月姐跟在我的後面，讓我有點不耐煩。
 
我停步。
 
她撞到我。




 
「你話我應該點？」我轉身問，「明明係你帶我黎既，話帶我去災區旅行，話係我執到寶。」
 
「但你……咁都算帶我旅行咩？」我很不滿，「你做過啲乜野啊？」
 
明月姐摸著下巴，認真地想。
 
「記唔記得最初，你係一個點既人？」她要我想。
 
「無欲無求，係咪？」她問，手指輕撩我的臉。




 
「依加呢？」她揚起嘴角，拍我臉一下，「有欲有求啦，係咪？」
 
「我唔知自己想點。」我說，抓住她的手，認真起來，「我覺得留係哩個黑白世界，目光就會，擺晒係佩盈身上。」
 
「就會圍住佢轉，就會想支持佢，想見到佢好。」我說。
 
路旁有自行車駛過，也有汽車駛過。
 
「咁係正常既。」明月姐說，「因為佢就係一個咁有魅力既人。」




 
「所以佢先會係彩色？」我問，又想起，「仲有小麗，都慢慢有左色彩，點解？」
 
「係咪每個人，都可以變成彩色？」我再問，「答我。」
 
「並唔係每個人都有資格變成彩色。」明月姐回答，「你就當哩個係我比你既謎題，你慢慢參透啦。」
 
「如果我冇辦法變成佩盈、小麗咁有魅力，係咪……只會一直變灰？」我問。
 
然而我，根本沒有辦法變成她們那樣。
 
她們有志向、有青春、有活力，又長得美麗。
 
「彩色之所以係彩色，係因為佢唔係一種顏色。」明月姐說，「佢係多種顏色。」
 




「紅黃藍綠，拍埋一齊，係彩色。青、紫、啡、粉紅，拍埋一齊，何嘗唔係另一種彩色？」她反問。
 
「加油啦。」她拍拍我的肩膀，「依加，首先諗下食咩仲好啦。」
 
「啊，仲有一點！」她想起。
 
我在聽著。
 
「對我黎講，旅行，唔係跟住行程，一步一步去完成。」她拿出眼鏡布，拿出無度數眼鏡。
 
「我知道既野實在太多，按計劃走既行程太無聊。」她抹抹眼鏡，「就好似依加啲人，上網搵齊資料先去旅行，出發前就已經知道晒每一點去邊，食咩餐廳，全部都按計劃行事，唔容許出錯……」
 
聽到「計劃」，我腦海，想起一些人。
 
我曾經在一間公司上班，有同事在入職的時候，就已經算好了所有的將來。




 
例如一萬五千元一個月的話，一年最多就是十八萬。三年後升職，能獲得多少加薪，數目又怎樣換算。假如最後工作到六十歲，總獲得的金額是多少，他全部都計算了。
 
滿意的話，就一直幹下去。不滿意，找到機會就立即離開。這些人，長期以一種自以為理性的目光處世，把自己放在計劃當中。
 
「幾無聊。」她說，慢慢戴上眼鏡，「我眼中既旅行係——」
 
「意外。」她說。
 
「無法預測既意外。」她說，「同無法預測既人認識，進入無法預測既發展，談一場無法預測既戀愛。」
 
「種種既意外，先至係旅行。」她沉醉在自己的話當中。
 
曾聽說，人生下來，就是一場旅行的開始。
 




前方是無法預測的際遇。
 
人們能掌握的只有當下的自己。
 
繼續有車駛過，掠過了我倆。
 
「交通意外，算唔算意外？」我問。
 
「你想我推你出去？」明月姐準備動手。
 
「唔洗喇唔該。」我笑說。