【校園】現實與平行時空的愛情故事: 第三十八章 – 錯的時間錯的人-5 (分離)

- 第三十八章 – 錯的時間錯的人-5 (分離)
 
「分離從來不易」
 
有一齊過先會有分離。
 
但點樣先算一齊過？
 
每個人既定義都唔同。
 




有人會覺得拖手先算，有人覺得要雙方確認關係。
 
咁你呢？
 
…………………分隔線…………………
 
雖然表白都冇做過就比人拒絕左。
 
好彩係自己都唔算投入，所以只係覺得好似冇左個朋友。
 




日復日，夜復夜。
 
中六既返學時光就只要讀書同補課。
 
其他課外活動近乎零。
 
放學要補課，星期六要補課。
 
每日就不停做Paper同Paper。
 




有一種對生活既厭倦。
 
究竟幾時先考完DSE？
 
由於我呢一年係第一年DSE。
 
冇Past Paper呢樣野。
 
所以大家做既都係之前會考或者高考既題目。
 
亦都好快就要考Mock卷。
 
我為左放鬆心情。
 
其實都冇咩點溫過書。




 
反而我課餘時間睇龍珠。
 
追返哂咁多集龍珠黎睇。
 
考完Mock既成績同自己預期差唔多。
 
生活亦都冇咩大改變。
 
最近阿飯開始理返我。
 
好似之前咁既好朋友好同學既關係。
 
 
 




去到Last Day要準備Study Leave。
 
大家果一日都不停影相，有同學會係其他同學件衫到簽名，有同學會派紀念冊比同學寫。
 
而我就係影相果班人，幫人影相，同人影相，被人影相。
 
果一日，我地果班同學校申請左留低BBQ，應該都史無前例掛。
 
果一晚，我地班同學同埋有教我地既老師一齊食野傾計，有講有笑。
 
大家都有著到班TEE一齊玩。
 
係BBQ完之前，我地中文老師去彈琴，我地班同學負責唱歌。
 
唱「那些年」




 
「那些年錯過的大雨，那些年錯過的愛情。」
 
雖然呢一首係愛情歌，但那些年既中學生捱就快完。
 
每個同學都留住不捨既表情同淚光。
 
有同學喊，有同學安慰。
 
最後大家係一條入左學校既長樓梯影左最後既班相完結左返學校既日子。
 
其實Study Leave距離考DSE仲有一段時間。
 
我自己都唔知應該要做啲咩。
 




溫書？冇咩興趣。
 
冇幾耐我就收到阿飯既電話，想約埋一齊溫書同補補佢啲數學。
 
之後我同佢就間唔中返學校圖書館溫書。
 
多數都會同埋阿魚或者其他同學一齊溫書。
 
好少會得我地兩個單獨溫習。
 
到之後，我同阿飯阿魚多數會係學校附近既家鄉雞餐廳溫書。
 
多數都係阿飯拎啲數學卷黎問我。
 
有時夜晚又會收到阿飯既電話，繼續講下佢既心事。
 
日復日，夜復夜。
 
好快就到左考DSE既日子
 
一切都黎得好快，亦好快就考完。
 
考完之後都係係屋企休息。
 
繼續間唔中收到阿飯既電話傾心事。
 
到放磅，我對自己既成績竟然比預期好。
 
雖然都入唔到大學，但讀個HD都仲得。
 
最後揀左一科酒店HD去讀。
 
亦好快阿飯打電話黎搵我。
 
佢問我意見，以佢既成績，讀香港大學係唔得。
 
台灣大學英文科ＶＳ香港大專商科
 
佢自己係中意讀商科，但只係ASSO。
 
我同佢講，去台灣讀書，起碼都係大學學位。但香港只係大專。
 
就係咁，佢就揀左去台灣讀書。
 
我唔知係咪因為我既原固先去台灣讀書，定係其實都有其他人叫佢去台灣讀書先去讀。
 
當然我緊係希望佢將來有好既發展，但之後我發覺我其實我自己想佢留低。
 
或者唔捨得佢掛。
 
我係佢飛去台灣前兩日左右，我用左兩晚通宵去寫左一份劇本。
 
一份關於我同佢既劇本。
 
唔知點解我會有呢個衝動去寫。
 
只係想係有限既時間比到一樣野送比佢做生日禮物。
 
就係咁，我係送佢機果日，我比左一隻手指佢，入面有幾句說話同一份劇本。
 
而佢都比左一封信比我。
 
就係咁，佢就走左。
 
當佢去左台灣冇幾耐，初初都有傾下計。
 
有試過一次Skype Facetime一次，佢仲話佢第一次比屋企人以外既人見到佢既家居Look。
 
直到佢生日果日，我問返佢有冇睇到隻手指。
 
佢話唔見左，我將份劇本Send左比佢。
 
之後，佢就冇再覆過我。
 
冇再覆過我。
 
「楓
 
阿楓，衷心多謝你！呢段時間如果唔係有你，我根本撐唔到…多謝你對我既忍耐，體諒，三更半夜聽我係到講，係咁叫，係咁煩，係咁喊，去到台灣，無左你，都係我其中一個擔心既地方！無人會再不眠不休陪我。我真係好多謝你！我地加埋肥Ken，識左6年，同班6年。這些年來的照顧，我收到了，全部係個心到，永遠都唔會走！原諒我曾經避開你，真係好對唔住，不過我想你知道，我係無心架！Sorry！點都好，單單既呢到真係表達唔到我對你既謝意！我希望，你地依然係我朋友，傷心既碼頭！！Keep in touch！
 
阿飯
2012年8月22日
2:29 am」