【校園】現實與平行時空的愛情故事: 第三十七章 – 錯的時間錯的人-4 (陪伴)

- 第三十七章 – 錯的時間錯的人-4 (陪伴)
 
每個人都想有個人陪伴住自己，無論開心或者傷心。
 
開心想同人分享，傷心想同人分擔。
 
只係呢個人係你邊一個人呢？
 
…………………分隔線…………………
 




唔知點解好快就收拾好心情，或者只係我唔係太中意阿心。
 
好快又回復返日常單身既生活。
 
每一日返學放學，日日如是。
 
直到有一晚。
 
我好記得呢一晚，話說我玩緊一隻電腦遊戲，叫跑Online。
 




一個就黎被世人忘記既一個電腦遊戲。
 
本身同緊肥Ken玩緊跑。
 
突然我收到一個電話，一個熟悉既名。
 
阿飯來電
 
我接聽左。
 




「………」只係聽到哭喊聲。
 
「喂？喂？你有冇事呀？」
 
「………」只係聽到哭喊聲。
 
如是者，我聽住呢個電話大約45分鐘都係哭喊聲。
 
當中我用MSN聯絡肥KEN同佢講阿飯打黎喊。
 
不過佢都冇講啲咩。
 
慢慢我聽到哭喊聲冇咁激動。
 
其實我都估到大約發生咩事。




 
佢係好耐之前其實同男朋友散左，不過好耐都放唔低。
 
之後終於聽到佢講野。
 
「我冇事啦。」
 
「你冇事就好，有咩再比電話我啦！」
 
就係咁，呢個電話就完左。
 
我亦都冇諗啲咩，阿飯想搵人陪，我咪陪下佢囉。
 
去到年尾，有個學校旅行，去梅窩。
 




其實梅窩好似冇咩好行，每個同學都諗住去果到BBQ，當然我都跟大隊。
 
同同學燒下野食，傾下計。
 
食食下，阿桶就拉左我去傾計同影下相自拍下。
 
我同佢都識左六年，曖昧過既，不過好似唔岩咁。
 
佢同我講，佢同一個男仔發展緊，但未一齊，講下佢地點樣曖昧到有感覺咁。
 
而呢個男仔係我識左9年既朋友，亦都估唔到佢地咁都有得發展。
 
我仲以為呢個男仔唔會拍拖。
 
傾下傾下就好快去完旅行。




 
後尾唔知點解阿飯跟埋我同阿桶一齊放學。
 
出返中環，一齊去搭電車，睇下風景，傾下閒計。
 
大家係上層車頭，我企係到，佢地兩個女仔坐係到。
 
有時傾兩句，有時靜靜地睇風景。
 
個感覺係幾舒服。
 
舒服在個感覺好輕鬆，亦都舒服在有兩個女仔陪我。
 
好快就過左呢一日。
 




之後既日子都係日日如是，返學放學。
 
又直到有一日。
 
阿飯Msg我。
 
「我唔中意我唔中意既人中意我」
 
我初頭我唔係好睇得明佢講咩。
 
但我之後理解到佢呢句點解。
 
「佢唔中意，佢唔中意既人，中意佢」
 
就係咁解。
 
佢應該係同我講。
 
其實當刻我先可能發覺，我中意左佢？
 
不過係佢感覺到我中意佢既時候已經斬釘截鐵咁同我講，唔比希望我。
 
果一刻，我係唔開心既。
 
除左好似比中意既人拒絕之外，仲好似冇左一個交心既朋友。
 
其實我自己回想，我自己冇做多其他野呀？
 
連我自己我唔係好發覺自己中意左佢。
 
不過有時女性既直覺係準既。
 
佢唔比假希望我，或者係一件好事。
 
只係我就好似少左一個交心既朋友。
 
傷心唔開心既時候會少左個交心既朋友分享。
 
可惜…