【校園】現實與平行時空的愛情故事: 第三十五章 – 錯的時間錯的人-2 (有緣)

- 第三十五章 – 錯的時間錯的人-2 (有緣)
 
有人話「相遇五百次先有一次相識」
 
咁究竟幾多次既相識先換黎一次拍拖呢?
 
…………………分隔線…………………
 
自從升上中五之後，慢慢同沛珩少左好多相處。
 




可能係因為新加坡件事既原因而令到大家繼續相處都有啲奇怪。
 
本來我間唔中都會教下佢數學，當然係佢主動搵我教佢先啦。
 
慢慢佢都搵左另一個數學老師教佢。
 
有時我會諗，佢會唔會同左佢男朋友講左件事呢？
 
不過如果講左既話，佢地應該分手都會，但又冇發生呢樣野，所以都應該冇講到。
 




慢慢都習慣左冇同沛珩一齊既時光。
 
又慢慢渡過左大半年。
 
機緣巧合之下，我參加左一個類似劇場既計劃，當中係同演藝學院合作。
 
入面有啲人係識既，有一個係本身劇社認識既師兄，有一個係同班同學。
 
之後冇幾耐又識到唔同既朋友仔，其中一個叫Hedy。
 




Hedy有一日問我有冇興趣去佢果邊個劇社玩。
 
之後就參加埋佢果邊既劇社。
 
去到中五暑假果陣，新劇社果邊有劇演出，當然我都有參與。
 
雖然唔係重要角色，但就係一個好好認識其他劇社既人既機會。
 
從中慢慢認識左唔同背景既朋友，有一半都係同自己差唔多年紀。
 
去到入台準備演出前，開始多左啲後台人員參加。
 
當中有幾個女仔，而其中就有一個女仔叫阿心。
 
佢比我既感覺係一個好照顧人既女仔，雖然佢細我一年，但佢做後台人員好肯幫手。




 
慢慢我同佢都傾多左計。
 
演出之後，佢問我一唔一齊出黎做暑期功課。
 
我應承左，之後就約左係佢屋企附近既地方一齊做功課。
 
一個星期差唔多幾乎見足七日。
 
有時就一齊出黎Hea，有時就一齊做下功課，有時就一齊聽下歌，每人一邊耳筒。
 
間唔中會有個劇社既朋友一齊做下功課，但多數都係我地兩個一齊做。
 
慢慢去到暑假既尾聲，有一次劇社約出黎燒野食。
 




有一個男社員拉埋我去一邊問我。
 
「你同阿心點嫁？」
 
「咩點呀？」
 
「你唔係唔知佢中意你呀？」
 
「下？係咩？」
 
「佢等左你好耐啦！」
 
就係咁，我先發現原來我後知後覺。
 
不過我對佢係有意思既，所以當晚就透過網上Skype去問佢。




 
「我中意你」
 
「等左你好耐啦！」
 
「下？」
 
「等到我頸都長埋先等到你講」
 
就係咁，我地就一齊左。