【校園】現實與平行時空的愛情故事: 第三十二章 - 第二次的戀愛-13 (環球影城)

- 第三十二章 - 第二次的戀愛-13
 
有時候愛情黎得快，但走得更快。
 
呢個旅行好快就會完結，只可以好好珍惜。
 
…………………分隔線…………………

• 第五日 –

 
由於第四日冇咩特別，所以無謂多講。




 
第五日既行程係最精彩，因為就係去環球影城玩！
 
一開始搭旅遊巴就去到環球影城。
 
領隊就搞緊啲門票，我地班學生就係到等同影下相。
 
之後領隊就比左每個學生十蚊，所以我地一班同學就去左入面一間餐廳到食野。
 
一間漢堡包店都係食漢堡包、薯條同汽水。




 
我地食完野之後就一齊周圍玩下。
 
一行四男三女，包括我同沛珩。
 
途中有去睇真人Show，係幾正，同荷李活差唔多級數。
 
之後去左玩一個激流既遊戲，類似海洋公園既滑浪飛船，但大隻既船黎。
 
點知就沖落去果下之前，有職員同我地講個遊戲有問題要暫停。




 
最後比返一張Fast Pass比我地就算。
 
之後我地去左玩一個叫Mommy既遊戲，佢係一個會向前又會向後既室內過山車，又有唔少特效，係幾好玩。
 
由於個遊戲入口去到玩遊戲既位置要行少少路，咁我地成班就當然慢慢行入去。
 
而我同沛珩就係後面靜靜雞拖住手咁行，係好開心，好似真係同女朋友一齊去玩。
 
當時亦冇諗到會唔會有其他同學見到。
 
之後都一直見冇咩人睇到果陣就拖住手。
 
玩果陣唔知係咪沛珩好怕玩過山車，佢一開始玩果陣已經係側邊攬實我，我感覺到佢係緊張同有少少驚。
 




不過我自己就好開心，因為佢咁樣攬實我更加似男女朋友。
 
後尾我地兩個仲一齊玩多幾次，我地兩個單獨玩就更加拖住一齊玩，感覺好甜蜜。
 
之後我地兩個搵返其他同學，我見到一個對腳半天吊既過山車好想玩，就提議去玩。
 
不過冇人敢去玩，沛珩當然都唔敢。
 
佢見到我想玩，但佢又唔想我去玩，於是佢就用好緊張既語氣同我講：「我唔想你去，好似好危險！」
 
呢一刻唔知點解真係感覺到佢緊張我在乎我。
 
最後我都放棄左冇去玩，不過我暗地裡係開心佢咁緊張我。
 
呢一日好快就完左，我覺得好開心，感覺到呢日係同沛珩拍緊拖去玩咁，真係好想一直都可以拖住落去。




 
可惜美好既時光過得好快……