我係一個驅魔師，專幫人驅散妖魔鬼怪: 85

我不斷踢落道門，但大門依然紋風不動！

點好……仲有方法！

我喺褸袋拎出最後一粒燃爆彈，點著之後掟落大門門鉸！

門鉸位轟一聲鬆脫，穆爾泰再用短劍將螺絲挑出嚟之後，一腳踢開大門！

就喺呢刻，灼熱嘅氣流直擊背脊。我轉身一望，熊熊火海如同海嘯向我哋湧過嚟！





我左右手抱起阿瞳同阿堯，喺火海湧嚟前一刻跳出屋外！

蓬——

＊

「凌寧壹先生，你上次身體未做詳細檢查就偷偷地逃離醫院，今次帶住新傷舊患返嚟，真係頂你唔順……唔該你愛惜下自己身體先得，好多人想健康都健康唔到，你就好似等唔切趕住去死咁樣。」

上次負責我嗰位醫生再次企喺我面前，邊望住報告，邊喋喋不休咁長篇大論。





「鼻骨骨折，後腦挫傷兼腦震盪，全身多處擦傷瘀傷同埋二級燒傷……加上之前嘅肌腱撕裂，角膜受損，你唔瞓返一個月都咪使指擬走。」

「連自己身體都唔好好睇住，咁樣做驅魔師遲早無命。」一道嘲諷從隔籬床傳嚟。

「穆爾泰先生，你身體都唔好得去邊，膊頭同手臂七處利器插傷，六處利器鎅傷，全身多處擦傷瘀傷同埋二級燒傷，你都要瞓返半個月……話說驅魔師係咩職業？神父嗰啲？」

「詭修女嗰啲。」瞓喺病床上嘅我望住天花刺眼嘅白燈答。

「原來係特技演員……喂，依家拍戲唔使咁搏嘛？咁樣搏法有錢都無命使……」醫生搖頭嘆氣一聲，「一陣會送你兩個做詳細檢查，特別你早有前科，今次我會叫多幾個護士睇住你。」





「麻煩到死。」我忍唔住講咗聲。

醫生走咗之後，我問穆爾泰：「件事最後點？」

「警察嗰邊霍靜幫手搞掂嘅事，應該掩飾成煮嘢食失火事件。」

「教會權力真大。」

「教廷底下有二十億信徒，有咁嘅勢力先叫正常。」

「嗰個叫阿笨……Ah Puch嘅神靈點？」我不經不覺學咗白寧啲壞習慣，「你無搵到有關瑪雅古神嘅召喚儀式？」

「瑪雅文明喺中世紀消失得一乾二淨，搵唔到。」穆爾泰搖頭，「不過神殿被毀，洗腦解除，失去信徒，就算未消失都無信仰去繼續支持存在。」

「你都認為神靈係需要信仰先能夠存在？」





呢個係我之前同白寧討論嘅前提，神靈係咪要透過吸取以信仰形式傳送嘅能量去維持自身存在。

「你有無諗過，本來係咪真係有神靈存在？」穆爾泰反問我。

「咩意思？」

「造神思維，喺古代科學未發達時代，人類將無法解釋嘅自然事件形容為神明人為造成，並加以崇拜。當崇拜唔存在嘅靈體，信仰無法抵達正確嘅靈體，但人類依然透過信仰釋放出微弱嘅能量。」

「於是日積月累，呢啲能量聚合一齊，化成神靈。」我明白穆爾泰嘅話，幫佢講埋下一句。

「無錯，造神思維唔係單止人類創話神話，而係人類創造神靈。」

「既然係由人類信仰創話出嚟，咁失去信仰之後就自然會消失。」





「睇嚟你個腦未蠢到一塌糊塗。」

「呢個係合理解釋之一，咁就可以解釋點解基督教興起之後，咁執著去摧毀各地嘅神話。」

過於相信虛假嘅妄想，最後創話出似真似假嘅事實，就係古代人嘅愚昧無知。

「咁點解，Ah Puch喺瑪雅文明摧毀之後並無消失？」我疑問。

「就算係虛假，佢都係『神』。擁有強大神通嘅古神，總會有一啲方法去避免自己被消滅。」

「你認為除咗Ah Puch，仲有其他古神以某種形式存在喺現實，或者其他高維空間？」

「鬼知。」

除咗我哋之後，阿瞳一家人都被送到醫院。





聽講佢哋醒返之後，唔記得發生過咩事，記憶保留喺變成狂信徒之前，除此之外並無大礙。

唯獨阿瞳爸爸，佢嘅右腳作為祭品獻畀神明，結果永久失去知覺，就連醫生詳細檢查完後都搵唔到結果。

不過，至少佢哋平安無事。

總算完成委託。

檢查完之後，我慢慢行出急症室。

「小凌！」

白寧好緊張跑到我面前。





「你無事啊嘛？你無事啊嘛？」

「成身包到一舊一舊，唔通我貪得意拎自己嚟包壽司？」

「小凌係衰人，係都要人擔心！」

「又無人要你自作多情。」

白寧鼓起臉腮，紅都面晒咁話：「小凌你——」

「多謝你。」

我拍一拍白寧個頭。

「我，返嚟喇。」