《憶海》 自從意外之後，我得到咗超能力: 第三部第七章

我倆沿著沙灘一直漫步，欣賞著夕陽灑在海面上的餘暉。半個太陽已經消失在平行線上，整個景色實在叫人流連忘返。

這令我不禁覺得假日遊走香港的郊外地區，呼吸大自然的新鮮空氣，欣賞景色怡人的風景，歇一歇來享受人生實在是人生一大樂事。

「真係好靚呀……好多謝你呀焱煒。」秋淼亦不禁讚嘆著說。

「係咪無跟我嚟錯呢？」我自豪地說。

「但係黃昏雖然好靚，但係往往都係一瞬即逝，好多野都係有剎那光輝，但係唔代表永恆，可能之後就無得再睇啦……」秋淼無奈地說。

「點會呢，你想嚟睇日落嘅幾多次都得，我仲會帶你上山睇日出，睇到你夠為止。」我走到秋淼面前，吻一吻她的額頭說。

「希望啦……」秋淼眼神閃過一絲悲傷。


可能今天實在玩得太多吧，一上車後秋淼便累透了，睡在我肩膀上。

忽然我肩膀好像濕了一片。

肯定是秋淼這個傻妹睡覺流口水吧，我這麼想著轉過頭來看她。

轉頭一看才發現原來是她的眼淚，我便從褲袋拿出手巾替她拭去眼淚。

她一定是發惡夢吧。

「傻妹，我咪同你講過，無論你遇到啲咩，我都會係你身邊同你一齊面對囉，使乜咁驚啵。」我抱緊秋淼，在她耳邊細聲說。

不過熟睡中的她應該聽不到吧。

「傻妹，使唔使喊成咁呀？」走出戲院後我拍著秋淼的頭笑說。

「咁真係好感動呀嘛，你完全無喊過你係咪冷血？」秋淼聲音仍然有點沙啞。

「邊有感動到咁誇張。」

「咁你會唔會好似佢地咁，下一世都仲揀我做你女朋友呀？」秋淼突然提問。

我一下子把她拉到我身前，從後抱著她，從她耳邊說：

「傻妹，你上一世咪問過囉。」

「哼，我好認真問。」秋淼半帶甜笑半帶不服氣地說「如果俾你再揀多次，你有無諗過揀其他女仔做你女朋友？」

「百世修得同船渡，千世修得共枕眠。我可以遇上你，做到你男朋友，實在係千世百世修返嚟嘅福氣，你認為我會改變用咁多時間做返嚟嘅決定咩？」我也很認真地回答秋淼。

「唔好再講啲令我自責嘅說話好唔好……」秋淼十分低聲地說。

「你啱啱講咩話？」她說得太低聲，連我也聽不清。

「無野啦……你睇吓個邊。」秋淼轉移話題說。


「停呀停呀！」一連串畫面令我頭痛欲裂，我按著頭大叫道，但大腦卻不聽指令繼續播放。


「劉炎煒呀呵。」

「係！」秋淼父親突然喚我姓名令我也嚇了一跳。

「你係秋淼男朋友？」

「係！」

「咁我估你都應該知應該要點做啦，總之同我醒醒定定對秋淼好啲，如果係呢個時候你仲搞到佢唔開心，我一定唔會放過你。」

這是恐嚇嗎……？

「知道！我會好愛秋淼，你放心啦。」我立刻生硬地回應。

「咁就好啦……」秋淼父親放鬆語氣，拍一拍我背後說「加油啦後生仔，而家先係開始。」

「連累你真係對唔住。」他向前走喃喃道。

不過聲音實在太小，我聽不到，我猜應該不是跟我說吧。






「唔好呀，求吓你停呀！」我的崩潰早已化成淚水，源源不絕地流下來。


離開花店沒多久，秋淼便叫住我。

「咩事呀？」我轉身問。

就在我轉身的那一剎那，便看見秋淼衝上來抱著我。

我們在很近的距離對視著，下一瞬間我們便吻了上來。

「傻妹，咁快就掛住我啦？」吻後我摸著她的頭說。

「再見啦，炎煒。」秋淼熱淚盈眶地說，水汪汪的眼睛實在惹人憐愛。

「我都係出國半個月姐，又唔係唔返嚟，最多返到嚟日日陪你啦。」我微笑道。

「唔。」秋淼含著淚點頭說。

送秋淼回花店後，我便再一次離開回家。